viasna on patreon

Што новага ў “справе БелТА”? Дапоўнена

2018 2018-08-09T11:50:32+0300 2018-08-09T17:43:38+0300 be https://spring96.org/files/images/sources/leushyna.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Галоўная рэдактарка БелаПАН Ірына Леўшына. Фота Радыё Свабода

Галоўная рэдактарка БелаПАН Ірына Леўшына. Фота Радыё Свабода

Як паведамляе TUT.BY, знікла сувязь з галоўным рэдактарам інфармацыйнай кампаніі БелаПАН Ірынай Леўшынай. Раніцай 9 жніўня Леўшына не з’явілася на працы, яе мабільны тэлефон адключаны.

Не выключана, што яна затрыманая супрацоўнікамі Следчага камітэта ў межах «справы БелТА». БелаПАН удакладняе, што ў Ірыны Леўшынай быў праведзены ператрус. Ускрыты сістэмны блок яе кампутара.

Заснавальніка інфармацыйнага партала TUT.BY Юрыя Зісера вечарам 8 жніўня дапыталі ў Следчым камітэце ў якасці сведкі. Працэсуальнае дзеянне цягнулася каля двух гадзінаў, з Юрыя Зісера ўзялі падпіску аб неразгалошванні.

Супрацоўнікі партала Realt.by Уладзіслаў Кулецкі, Ігар Хмара, Марыя Сарока і Алена Маслоўская пасля допыту ў Следчым камітэце таксама былі адпушчаныя, з іх таксама ўзялі падпіску аб неразгалошванні. Вядома, што з офісу кампаніі былі канфіскаваныя камп’ютары і ноутбукі.

Дагэтуль у статусе падазраваных за кратамі застаюцца журналісты TUT.BY Марына Золатава, Ганна Калтыгіна, Галіна Уласік і Ганна Ерманчонак, карэспандэнтка БелаПАН Таццяна Каравянкова, медыаэсперт Паўлюк Быкоўскі і журналіст Аляксей Жукаў.

Мэдыакампанія Deutsche Welle запатрабавала неадкладнага вызвалення свайго беларускага карэспандэнта Паўла Быкоўскага. З заклікам «устрымацца ад непрапарцыйных дзеянняў супраць журналістаў» да беларускіх уладаў звярнулася МЗС Нямеччыны.

Заклапочанасць пераследам журналістаў выказала Хельскінкская камісія ЗША. Старшыня арганізацыі Роджэр Уікер выступіў з заявай, у якой заклікаў беларускія ўлады "вызваліць затрыманых журналістаў і спыніць пераслед тых, хто прысвячае сваё жыцьцё таму, каб раскрыць праўду і падзяліцца ёю з іншымі".

Адбыўся допыт карэспандэнткі БелаПАН Таццяны Каравянковай у Следчым камітэце ў прысутнасці яе адваката. Пра гэта паведамляе БАЖ. Заўтра ў 11.10 сканчваецца тэрмін яе затрымання. І на заўтра ж прызначана наступнае следчае дзеянне, але час не агучаны. Таццяна Каравянкова атрымала перадачу ў ізалятар і дзякуе ўсім, хто ёй дапамагае. Яна адчувае ў цэлым сябе нармальна — настрой бадзёры.

Усе гэтыя дні Таццяна знаходзілася ў ізалятары на Акрэсціна. Аднак ні з кім з фігурантаў "справы БелТА" не перасякалася.

Рэдактарку TUT.BY Галіну Уласік выпусцілі са Следчага камітэту. Пра гэта адвакат паведаміў дачцэ журналісткі - Валерыі Уласік. Інфармацыю падцвердзіў і дзяжурны СК.

Галіну Уласік адпусцілі ў статусе падазраванай, падпіску пра неразгалошванне яна не падпісвала.

Фота TUT.BY
Фота TUT.BY

Таксама вызвалілі рэдактарку Ганну Калтыгіну, напісаў заснавальнік Tut.by Юры Зісер.

Разам з Арганізацыяй бяспекі і супрацоўніцтва ў Еўропе (АБСЕ) Федэральны ўрад Нямеччыны выказаў заклапочанасць у сувязі з арыштам шасці беларускіх журналістаў, сярод якіх карэспандэнт Deutsche Welle, і заклікаў Мінск праяўляць стрыманасць, паведамляюць нямецкія СМІ.

Злучаныя Штаты Амерыкі занепакоеныя затрыманнямі журналістаў у Беларусі і ператрусамі, праведзенымі ўладамі ў офісах некалькіх незалежных выданняў на гэтым тыдні. Пра гэта гаворыцца ў заяве, размешчанай на сайце амбасады ЗША ў Беларусі, пішуць naviny.by.

Нагадаем, 7 жніўня ператрусы і затрыманні прайшлі ў офісах кампаній TUT.BY і БелаПАН. У СК заявілі, што падставай да ўзбуджэння крымінальнай справы паслужыла паведамленне рэспубліканскага ўнітарнага прадпрыемства «БелТА» аб збоях пры ажыццяўленні доступу да платнай падпіскі паслуг, якія прадастаўляліся названым прадпрыемствам аднаму з яго заказчыкаў.

Таксама ведамства паведаміла пра следчыя дзеянні з удзелам службовых асобаў рэдакцыйна-выдавецкай установы «Культура і мастацтва», ТАА «РіэлтБай», ТАА «АйТіВі». Якія менавіта следчыя дзеянні вядуцца ў дачыненні “АйТіВі”, не паведамляецца —  гэта кампанія, якая займаецца інтэрнэт-тэлебачаннем, распрацоўкай праграмнага забеспячэння (дадаткаў для Smart TV, Android, iOS), а таксама інтэграцыяй медыаплатформаў.

Са словамі заклапочанасці і патрабаваннем вызваліць журналістаў ужо выступілі Савет Еўропы, «Рэпарцёры без межаў». На хвалю ператрусаў і затрыманняў журналістаў у Беларусі адрэагавалі і вядучыя СМІ ўсяго свету. Як паведамляюць naviny.by, «Еўраньюс» выпусціў сюжэт пра ператрусы ў БелаПАН і TUT.by і затрыманні журналістаў.

Праваабарончыя арганізацыі Беларусі звярнуліся да спецдакладчыка ААН і прадстаўніка АБСЕ па пытаннях свабоды СМІ.

Апошнія навіны

Партнёрства

Сяброўства