viasna on patreon

Мікалай Дзядок: Затрыманне і суд лічу асабістай помстай мне начальніка ГУБАЗіК

2018 2018-07-12T20:34:18+0300 2018-07-13T12:35:34+0300 be https://spring96.org/files/images/sources/mikola_dziadok2.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Мікалай Дзядок. Фота spring96.org

Мікалай Дзядок. Фота spring96.org

Анархіст і былы палітвязень Мікалай Дзядок расказаў Праваабарончаму цэнтру “Вясна” падрабязнасці свайго затрымання раніцай 12 ліпеня, хто і ў чым яго абвінаваціў і што ён збіраецца рабіць далей.

Так, ён распавёў, што выйшаў з дома каля 9.30 раніцы, адразу да яго пад’ехаў спецаўтамабіль, з яго выйшаў амапавец з відэарэгістратарам. Ён прадставіўся і прапанаваў прайсці актывісту ў аўтамабіль, што той і зрабіў. У машыне ў Мікалая Дзядка ўдакладнілі прозвішча і адвезлі ў РУУС Фрунзенскага раёна, не кажучы пра падставы затрымання.

“Там мяне перадалі нейкаму оперу, які пачаў мяне распытваць пра маю асабістую фэйсбук-старонку. Я папрасіў яго прадставіцца і сказаць, за што мяне затрымалі. Тады я і даведаўся, што мяне вінавацяць у нібыта здзяйсненне адміністрацыйнага правапарушэння па арт. 17.10 – распаўсюд ці дэманстрацыю нацысцкай сімволікі.

Опер пачаў казаць мне пра нейкія карцінкі ў фэйсбуку. Я вяду старонку ўжо тры гады і канешне за гэты час там можа быць усё, што заўгодна. Я папрасіў даць мне азнаёміцца з адміністрацыйнай справай супраць мяне”, - распавядае актывіст.  

У матэрыялах справы Мікалай Дзядок заўважыў, што першым там быў рапарт начальніка трэцяга аддзялення па супрацьдзеянню экстрэмізму ГУБАЗіК Міхаіла Бедункевіча, у якім было адзначана, што на старонцы актывіста ў Фэйсбуку выяўленыя пасты з дэманстраваннем нацысцкай сімволікі. Аднак, далей праглядзець матэрыялы справы Мікалаю Дзядку не далі, спаслаўшыся на тое, што дакументы “для службовага карыстання”. Не далі затрыманаму і патэлефанаваць абаронцу, пры гэтым супрацоўнік РУУС настойліва падсоўваў на подпіс паперу пра правы і абавязкі, дзе сярод іншага значылася і права на абаронцу. Актывіст такую паперу падпісваць адмовіўся. 

Пасля каля двух гадзінаў утрымання ў аддзяленні міліцыі Мікалая Дзядка адвезлі ў суд, зноўку нікому нічога не паведаміўшы. Справу разглядала суддзя Ганна Буйноўская.

“У судзе я заявіў два хадайніцтвы – на азнаямленне з матэрыяламі справы і на прысутнасць абаронцы ў працэсе. Абодва яны былі задаволеныя.

Калі я паглядзеў у матэрыялы справы, то ўбачыў, што мяне прыцягваюць да адказнасці за тры карцінкі, якія нібыта з’явіліся прапагандай нацызму”, - падкрэслівае актывіст.

Так у справе былі:

  • Скрыншот з аднага з артыкулаў “Новага часу”, які быў прысвечаны падзеям 9 траўня, дзе былі ілюстрацыйна сумешчаныя свастыка і серп ды молат;
  • Карцінка, на якой свастыка была ўстаўлена ў круг і з яе выходзілі стрэлкі, якую Мікалай Дзядок размесціў з подпісам “Зрабіце мяне разбачыць гэта”;
  • Скрыншот з відэа забаўляльнай праграммы “Маскі шоў”, дзе акцёры едуць на трамваі, ўвешанным сцягамі са свастыкай.

“Я адзначыў у судзе, што ўсе тры карцінкі або ў саркастычным, або негатыўным кантэксце запошчаныя. А гэта азначае, што там і блізка няма прапаганды нацысцкіх поглядаў”, - удакладняе Мікалай Дзядок.

Падчас працэсу суддзя дайшла да пытання, ці з’яўляецца ён актывістам анархісцкага руху.

“Я сказаў прама: “Так, я анархіст, гэта праяўляецца ў тым, што я публічна так сябе пазіцыяную і стасуюсь з людзьмі адпаведных поглядаў. У звязку з гэтым я негатыўна стаўлюся да нацызму і ніякай прапаганды ці распаўсюду нацысцкай сімволікі ў мяне быць не можа”, - распавядае Мікалай Дзядок.

Таксама ў судзе высветлілася, што міліцыянеры нават не склалі пратакол адміністрацыйнага затрымання. Больш за тое, стала вядома, што ўсе тры карцінкі былі размешчаныя на старонцы ад дзевяці месяцаў да палутара год таму, а выяўленыя яны былі толькі 10 ліпеня 2018 года.

“І паўстае пытанне: як так гэтыя карцінкі нікому не былі патрэбныя, а тут знянацку Бедункевіч іх знайшоў? Я лічу, што гэта была асабістая помста мне за тое, што пасля спецаперацыі сілавікоў у Крупках, я напісаў у сваім фэйсбуку саркастычны пост, у якім адзначыў, што пазнаў начальніка ГУБАЗіК нават у масцы”, - упэўнены актывіст.

У выніку суддзя прызнала Мікалая Дзядка вінаватым у здзяйсненні адміністрацыйнага правапарушэння і пакарала штрафам у 10 базавых велічынь. Гэта трохі здзівіла актывіста, бо ён заўсёды настройваецца на горшае і гэтым разам быў гатовы да арышту.

“Аднак, паколькі сутак мне не далі, я лічу, што ГУБАЗ, не атрымаўшы жаданага пакарання для мяне, можа ў любы момант зноў затрымаць і працягнуць помсціць”, - кажа Мікалай Дзядок.

Цяпер ён збіраецца абскардзіць рашэнне суда Фрунзенскага раёна, а таксама падаць скаргу на парушэнне працэсуальных нормаў супрацоўнікамі міліцыі пры яго затрыманні. 

Апошнія навіны

Партнёрства

Сяброўства