viasna on patreon

Неабыякавыя стварылі петыцыю ў адказ на гамафобны артыкул МУС

2018 2018-05-21T14:37:00+0300 2018-05-21T15:02:13+0300 be https://spring96.org/files/images/sources/stiag_lgbt.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

На сайце “Зручны горад” з’явілася петыцыя “За сапраўдную міліцыю – для ўсіх” супраць гамафобнага артыкула, размешчанага 20 траўня на афіцыйным сайце Міністэрства ўнутраных спраў Беларусі “Мы - за сапраўднае!”.

У ім МУС непрыязна выказвалася пра людзей ЛГБТК+ і вясёлкавы сцяг, які амбасада Велікабрытанія размясціла над сваім уваходам у Міжнародны дзень барацьбы з гамафобіяй, трансфобіяй і біфобіяй –  17 траўня.

У сваю чаргу, стваральнікі петыцыі адзначаюць, што згодна з Канстытуцыяй “чалавек, яго правы, свабоды і гарантыі іх рэалізацыі з’яўляюцца найвышэйшай каштоўнасцю і мэтай грамадства і дзяржавы”, а сэксуальная арыентацыя з’яўляецца ўласнай справай кожнага чалавека, за якую не прадугледжана ніякай прававой адказнасці.

“Органы ўнутраных спраў працуюць за падаткі грамадзян і ў іх інтарэсах, нідзе ў заканадаўстве не замацавана права МУС выступаць з ідэалагічнымі каментарамі і даваць неправавыя адзнакі асобных сітуацыях, замест выконвання сваіх асноўных абавязкаў па папярэджанні і раскрыцці злачынстваў”, - падкрэсліваецца ў петыцыі.

Акрамя гэтага, стваральнікі петыцыі звяртаюць увагу на тое, што ў артыкуле МУС апошняя фраза “Мы – за сапраўднае, яны не прайдуць!” можа выступаць як пагроза і заклік да гвалтоўных дзеянняў у дачыненні да ЛГБТК+ людзей.

Пасля збору подпісаў петыцыя будзе накіраваная ў Генеральную пракуратуру Рэспублікі Беларусь і МУС з просьбай праверыць законнасць такіх выказванняў з боку МУС, прыбраць дадзены артыкул з афіцыйнага сайта дзяржоргана і надалей устрымацца ад каментароў, у якіх адмаўляецца абавязак органаў унутранных спраў абараняць жыццё, здароўе, гонар, годнасць, правы, свабоды і законныя інтарэсы грамадзян ад злачынных і іншых супрацьпраўных замахаў незалежна ад іх грамадзянства, сацыяльнага, маёмаснага і іншага становішча, расавай і нацыянальнай прыналежнасці, полу, узросту, адукацыі і мовы, адносіны да рэлігіі, палітычных і іншых перакананняў, а таксама ад іншых абставінаў.

Нагадаем, 17 траўня прызначана Міжнародным днём барацьбы з гамафобіяй. Менавіта ў гэты дзень у 1990 годзе гомасэксуальнасць была выключана з Міжнароднай класіфікацыі захворванняў.

У гэтым годзе амбасада Велікабрытаніі ў Мінску вывесіла вясёлкавы сцяг, каб прыцягнуць увагу грамадскасці да праблемаў ЛГБТК+ людзей і дыскрымінацыі, з якой яны сутыкаюцца, а таксама з мэтай прасоўвання правоў ЛГБТ-супольнасці.

Беларусь, згодна з даследваннем міжнароднай арганізацыі ILGA-Europe, знаходзіцца на 42 месцы з 49 краінаў Еўропы па ўзроўню гамафобіі.

Апошнія навіны

Партнёрства

Сяброўства