viasna on patreon

Савет па правах чалавека Расіі і прадстаўнікі грамадскасці выступілі ў абарону Аюба Ціціева

2018 2018-05-15T12:48:52+0300 2018-05-15T12:48:52+0300 be https://spring96.org/files/images/sources/titiev_oub.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Аюб Ціціеў

Аюб Ціціеў

Савет па правах чалавека пры прэзідэнце РФ на сваім пасяджэнні 11 траўня зноў узняў пытанне пра крымінальны пераслед кіраўніка ПЦ "Мемарыял" у Чачні Аюба Ціціева, паведамляе «Новая газета».

З дакладам пра справу Аюба Ціціева выступіў праваабаронца Ігар Каляпін, які распавёў пра не ўнікальную тактыку Следчага камітэта Расіі ў цэлым і чачэнскага СУСКа у прыватнасці, якая выяўляецца ў сабатажы расследавання злачынстваў, учыненых супрацоўнікамі паліцыі. Тактыка такая: па заяве супрацоўнікаў паліцыі ўзбуджаецца крымінальная справа - усё абвінавачанне супраць Аюба Ціціева пабудавана на двух рапартах супрацоўнікаў Курчалоеўскага РАУС, якія нібыта выявілі наркотыкі ў яго машыне. А па заяве Аюба Ціціева, які сцвярджае, што яму гэтыя самыя супрацоўнікі падкінулі наркотыкі, праводзіцца бясконцая праверка, па якой следчы роўным лікам нічога не робіць. Проста чакае, калі крымінальная справа паступіць у суд, суд вынесе прысуд, і прысуд стане падставай для канчатковага спынення праверкі па заяве аб злачынстве, учыненым супрацоўнікамі паліцыі.

Ігар Каляпін, прааналізаваўшы матэрыялы праверкі, праведзенай следчым чачэнскага СУСКа па заяве Ціціева, канстатаваў: следчыя маглі лёгка разбурыць версію супрацоўнікаў паліцыі, аператыўна запатрабаваць запісы з камераў вонкавага назірання Курчалоеўскага РАУС і аддзела УФСБ Чачні па Курчалоеўскаму раёну. На гэтых відэазапісах зафіксавана, як Аюба Ціціева спынілі трое супрацоўнікаў групы неадкладнага рэагавання Курчалоеўскага РАУС. Як адзін з іх падклаў ў машыну праваабаронцы наркотыкі. Як Аюба Ціціева даставілі ў Курчалоеўскі РАУС, дзе спрабавалі дамагчыся ад яго прызнальных паказанняў. Калі ён не паддаўся ціску, яго зноў адвезлі на месца затрымання, выклікалі панятых і канфіскавалі наркотыкі ў другі раз - цяпер ужо «па законе».

Заяву ў чачэнскі СУСК адвакат Ціціева Пётр Заікін падаў 12 студзеня. І - адначасова з заявай - хадайніцтва аб тэрміновай канфіскацыі відэазапісаў з камераў вонкавага назірання, устаноўленых у Курчалоеўскім РАУС. Следчы цягнуў з задавальненнем хадайніцтва адваката больш за месяц. Замест таго каб асабіста выехаць у Курчалой, следчы паслаў запыт. А калі атрымаў адказ (па версіі начальніка Курчалоеўскага РАУС, відэакамеры ў той дзень зламаліся), нават не стаў правяраць - ці так яно на самой справе.

Калі б следчы заклапаціўся такой праверкай, ён бы са здзіўленнем даведаўся, што ў дзень затрымання Аюба Ціціева ў Курчалой не працавалі наогул усе камеры. На будынку пракуратуры, на аддзяленні «Рассельгасбанка», на аддзяленні Ашчадбанка, на будынку Аддзела працы і сацыяльнага развіцця, на будынку АТ «Чачэнэнэрга», на аддзяленні Пенсійнага фонду. Абсалютна ўсе камеры па маршруце руху Аюба Ціціева - ад месца затрымання машыны да Курчалоеўскага РАУС - не зафіксавалі у той дзень нічога, так як ва ўсіх здарылася "тэхнічная няспраўнасць". І толькі адна камера працавала ў Курчалой - на будынку раённага аддзела УФСБ Чачні. Аднак кіраўніцтва УФСБ ЧР у адказе на запыт Упаўнаважанага па правах чалавека ў РФ Таццяны Маскальковай напісала, што іх відэакамера фіксуе супрацьлеглы ад АМУС РФ па Курчалоеўскаму раёну кірунак. Але справа ў тым, што будынкі аддзелаў МУС і ФСБ на Курчалой размешчаныя так, што ў «процілеглым кірунку» камера можа фіксаваць толькі сцяну з чырвонай цэглы.

«Ёсць такое паняцце, як "аператыўнае суправаджэнне" следства. А ёсць - палітычнае суправаджэнне. І яго па справе Аюба Ціціева ажыццяўляе асабіста кіраўнік Чачні Кадыраў, - сказаў на пасяджэнні СПЧ Ігар Каляпін. - Але праблема тут нават не ў Чачне і не ў Кадыраве. Праблема ў тым, што мы маем справу з пазіцыяй Следчага камітэта, якую калі не абараняе, то дакладна пакрывае пракуратура. Чаму ў грамадзяніна, які звярнуўся з заявай пра злачынства, што было здзейснена супраць яго паліцэйскімі, правоў менш, чым у паліцэйскіх, якія напісалі падробленыя рапарты? Чаму ў адным выпадку Следчы камітэт бяздзейнічае, а ў іншым - тут жа ўзбуджае крымінальную справу? Ды таму, што такая ўстаноўка. Ня толькі ў Чачні - па ўсёй краіне. Таму не важна, ці з'яўляецца Ціціеў ворагам Кадырава. Важна іншае: кіраўнік СКР Аляксандр Бастрыкін і генеральны пракурор Юрый Чайка публічна абяцалі (у тым ліку Савету па правах чалавека), што гэтая справа будзе расследаваная аб'ектыўна. І ўжо пара задаць ім ключавыя пытанні».

Па выніках пасяджэння Савет выпусціў прэс-рэліз, з якога вынікае, што Савет мае намер:

1) устанавіць дзяжурства членаў СПЧ па паездках у Чачню на судовы працэс па справе Аюба Ціціева;

2) падрыхтаваць экспертнае заключэнне аб татальнай практыцы пагарды правамі заяўнікоў з боку следчых СКР і наглядальных супрацоўнікаў пракуратуры;

3) звярнуцца да А. Бастрыкіна і Ю. Чайкі з просьбай даць аператыўны каментар па фактах парушэння закона, якiя дапушчаны іх супрацоўнікамі ў ходзе праверкі заявы Аюба Ціціева.

Між тым, 12 траўня Аюб Ціціеў быў узнагароджаны прэміяй Маскоўскай Хэльсінкскай групы «За мужнасць у абароне правоў чалавека». А 15 траўня прэзідэнту Расіі Уладзіміру Пуціну быў накіраваны ліст з просьбай узяць справу пад кантроль і пакласці канец ганенню ПЦ "Мемарыял", падпісаны вядомымі дзеячамі мастацтва і навукі, журналістамі, прадстаўнікамі духавенства. Усяго пад тэкстам падпісалася 60 чалавек, сярод якіх Людміла Аляксеева, Чулпан Хаматава, Лія Ахеджакава, Павел Лунгін, Леанід Парфёнаў, Людміла Уліцкая і іншыя.

Акрамя гэтага, дачка забітай у Чачні праваабаронцы Наталлі Эстэміравай Лана запусціла петыцыю па зборы подпісаў за вызваленне Аюба Ціціева.

Нагадаем, праваабаронца Аюб Ціціеў быў затрыманы 9 студзеня гэтага года. У яго машыне пад пярэднім сядзеннем быў знойдзены скрутак з 200г марыхуаны. Пасля затрымання яго даставілі ў Курчалоеўскі АМУС, дзе праваабаронца паказаў, што канфіскацыя пакета з машыны прайшла без панятых. Тады паліцэйскія адправіліся разам з ім назад на трасу, дзе яго машыну зноў спынілі і агледзелі ўжо з панятымі. У ПЦ "Мемарыял" ўпэўненыя, што крымінальная справа стала вынікам, у прыватнасці, расследавання лёсу 27 зніклых у 2017 годзе жыхароў Чачні. У арганізацыі нагадваюць, што кіраўніцтва рэспублікі не раз заяўляла: праваабаронцам у Чачні не месца.

Інкрымінаваны чачэнскімі сілавікамі 60-гадоваму Ціціеву артыкул - практыкуемы спосаб барацьбы з непажаданымі ў Чачні журналістамі, грамадскімі дзеячамі і праваабаронцамі. 

Праваабаронцы Беларусі 7 лютага звярнуліся да прэзідэнта РФ з пратэстам супраць арышту Аюба Ціціева, а Праваабарончы цэнтр "Мемарыял" прызнаў яго палітвязнем. 

Апошнія навіны

Партнёрства

Сяброўства