"Судоў ня будзе, па ўсіх пытаннях тэлефануйце ў РУУС" Дапоўнена
Праваабаронца Наста Лойка і назіральніца Таццяна Мастыкіна рыхтуюцца да суду
Адміністрацыйныя справы затрыманых 25 сакавіка ў Мінску актывістаў, валанцёраў, праваабаронцаў і проста грамадзян, разглядаюцца сёння ў судах Мінска. Большасць працэсаў пройдзе, меркавана з 12 гадзін, у судзе Савецкага раёна Мінска.
Па звестках праваабаронцаў, складзена больш дзесятка пратаколаў правапарушэнняў па арт. 23.34 КаАП (удзел у несанкцыянаваным масавым мерапрыемстве). Некалькі чалавек абвінавацілі ў непадпарадкаванні службовай асобе па арт. 23.4 каАП.
Вядома, што пратаколы складзены на валанцёраў-назіральнікаў Максіма Кавалёва (ч.3. арт 23.34), Таццяну Мастыкіну (арт. 23.34 і 23.4 КаАП), Андруся Крэчку (ч.1 арт. 23.34), Ігара Багачова (ч.1. арт. 23.34), праваабаронцу Насту Лойка (ч.1. арт. 23.34).
Суды таксама чакаюць грамадскіх актывістаў Сяргея Спарыша, Валянціна Троцкага, Алену Талстую, Вольгу Нікалайчык (суд Партызанскага раёна), Валерыя Бычкоўскага, Артура Журава, Галіну Цярэнцьеву, айца Вікенція.
Большасць затрыманых адпусцілі з РУУСаў без складання пратаколаў, пратрымаўшы ад 1 да 5 гадзін. Найбольшы час правяла ў Першамайскім РУУС Ніна Багінская – каля 9 гадзін.
Па папярэдніх дадзеных, колькасць затрыманых 25 сакавіка у Мінску складае крыху больш за 60 чалавек. На раніцу 26 сакавіка ўстаноўленыя прозвішчы 42 затрыманых. У іншых гарадах на розны час затрымлівалі каля 50 чалавек. Некалькі чалавек пакінулі ў ізалятарах часовага ўтрымання.
***
У судзе Савецкага раёна па стане на 11-30 адсутнічаюць матэрыялы адміністрацыйных спраў, няма і раскладу судовых паседжанняў.
- Праваабаронца Наста Лойка рыхтуецца да суду
- Валянцін Троцкі з адвакатам.
У судзе збіраюцца праваабаронцы, палітыкі, грамадскія дзеячы, прадстаўнікі СМІ. Сярод іх - Уладзімір Някляеў, Алег Гулак, Алесь Бяляцкі, Марына Адамовіч, Ул. Сіўчык, Ігар Лялькоў.
Сакратар суда абвесціла, што судоў сёння не будзе. Прычынаў такога рашэння не патлумачылі і новай даты не назвалі. Аднак ніхто не разыходзіцца, бо баяцца, што суды могуць правесці без удзелу правапарушальнікаў.
Урэшце у калідор выйшла асістэнтка суддзі Дзмітрыя Жданка Юшкевіч Анастасія і сказала, што пратаколаў ім не перадалі і сёння справы ня будуць разглядацца.
"Па ўсіх пытаннях тэлефануйце ў РУУС" - адзначыла яна.
Начальнік аддзела правапарадку і прафілактыкі правапарушэнняў (ААПП) Цімур Кессель падцведзіў журналістам, што судоў ня будзе. Каментаваць свае словы адмовіўся.
