Запрашаем на прэзентацыю гадавой справаздачы па маніторынгу месцаў несвабоды ў Беларусі

2018 2018-01-16T11:53:00+0300 2018-01-17T11:59:48+0300 be http://spring96.org/files/images/sources/sapielka-spravazdacha2017.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

18 студзеня ПЦ “Вясна” прадставіць вынікі маніторынгу месцаў несвабоды ў Беларусі за 2017 год. Запрашаем прадстаўнікоў медыя, калег-праваабаронцаў і ўсіх, хто цікавіцца гэтай тэмай, на прэзентацыю.

Прэзентацыя справаздачы “Рэспубліка Беларусь: месцы несвабоды” будзе праходзіць на пляцоўцы Прэс-клуба па адрасе: г. Мінск, вул. Веры Харужай, З – 601. Пачатак у 13:30.

Удзельнікі прэзентацыі:

Павел Сапелка, праваабаронца “Вясны”, эксперт у пытаннях пенітэнцыярнай сістэмы, які з’яўляецца аўтарам справаздачы;

Алег Гулак, старшыня Беларускага Хельсінкскага камітэта, сябра Рэспубліканскай грамадскай назіральнай камісіі пры Міністэрстве юстыцыі, якая ажыццяўляе грамадскі кантроль за выкананнем правоў асуджаных;

Сяргей Усцінаў, прадстаўнік ініцыятывы “Праваабаронцы супраць катаванняў”.

Таксама да ўдзелу ў мерапрыемстве запрошаныя асобы, якія падвяргаліся адміністратыўным арыштам падчас падзеяў вясны-2017, і сваякі асуджаных, якія адбываюць пакаранні ў месцах пазбаўлення волі.

Павел Сапелка, аўтар маніторынгавай справаздачы
Павел Сапелка, аўтар маніторынгавай справаздачы

Справаздача “Рэспубліка Беларусь: месцы несвабоды (2017)” – пятая справаздача, падрыхтаваная Праваабарончым цэнтрам “Вясна” ў межах маніторынгу месцаў прымусовага ўтрымання грамадзянаў у Беларусі. У адрозненні ад папярэдніх, у якіх рабіліся тэматычныя акцэнты, новая публікацыя з’яўляецца своеасаблівым абагульненнем раней узнятых пытанняў, падмацаваным новай інфармацыяй, якую праваабаронцы цягам году збіралі з розных крыніцаў, а таксама ў непасрэдных кантактах з асобамі, якія ўтрымліваліся ў месцах несвабоды, іх сваякамі.

Прадстаўляючы чарговую маніторынгавую справаздачу, яе аўтар канстатуе, што за апошні час у грамадстве ўзрасла цікавасць да праблемаў пенітэнцыярнай сістэмы. І хоць рана казаць пра нейкія станоўчыя змены ўнутры сістэмы, але, дзякуючы таму, што гэтыя праблемы ўвесь час знаходзяцца ў фокусе ўвагі грамадскасці, сітуацыя не скатваецца ў горшы бок і Дэпартамент выканання пакаранняў МУС у такой сітуацыі павінен прадпрымаць намаганні для яе паляпшэння.   

Апошнія навіны

Партнёрства

Сяброўства