Следчы камітэт адмовіўся распачынаць справу па факце збіцця рэдактара сайта

2017 2017-07-26T09:35:38+0300 2017-07-26T11:52:49+0300 be http://spring96.org/files/images/sources/maruk-dzianis.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Дзяніс Марук. Фота: baj.by

Дзяніс Марук. Фота: baj.by

Дзяніс Марук, рэдактар сайта “Реальный Брест”, звярнуўся ў мясцовую пракуратуру і Следчы камітэт пасля таго, як 28 сакавіка 2017 года быў затрыманы супрацоўнікамі Ленінскага РАУС горада Брэста. Пра гэта паведамляе служба маніторынгу ГА "Беларуская асацыяцыя журналістаў".

Паводле словаў Дзяніса Марука, міліцыянты неаднойчы спрабавалі выклікаць яго “на размову” пасля таго, як на сайце “Реальный Брест” (realbrest.by) з’явіўся рэпартаж пра “Марш недармаедаў”, што адбыўся ў Брэсце 5 сакавіка. Падставай для гутаркі было тое, што падчас акцыі Марук прадэманстраваў непрыстойны жэст на адрас “чалавека ў цывільным”, які насамрэч быў міліцыянтам. Пазней за гэтае правапарушэнне журналіста пакаралі штрафам у памеры 2 базавыя велічыні.

Калі 28 сакавіка рэдактар сайта нарэшце прыйшоў у міліцэйскі пастарунак, каб вырашыць іншыя асабістыя пытанні, яго затрымалі. Па версіі Дзяніса Марука, супрацоўнікі Ленінскага РАУС абыходзіліся з ім вельмі жорстка: білі галавой аб сцяну, кінулі на падлогу, спрабавалі сталовай лыжкай расціскаць зубы, каб забраць схаваную журналістам флэш-карту.

Пасля гэтага здарэння Марук зафіксаваў пабоі і вырашыў дамагацца пакарання міліцыянтаў, што збілі яго ў пастарунку. Заява рэдактара амаль тры месяцы разглядалася ў Следчым камітэце, пакуль адтуль не прыйшоў адказ, што падставаў заводзіць справу няма.

“З адказу вынікае, што міліцыянты дзейнічалі ў межах закона, а ўсталяваныя ў Ленінскім РАУС відэакамеры не зафіксавалі фактаў майго збіцця, - кажа Дзяніс Марук. – Варта адзначыць, што апошнім часам следчых вельмі цікавілі падрабязнасці маёй судова-медычнай экспертызы, бо яны былі схільныя разглядаць версію, што я сам сабе нанёс пашкоджанні і зрабіў ілжывы данос на супрацоўнікаў міліцыі. У выніку вырашана, што супраць мяне таксама справу распачынаць не варта”.

Апошнія навіны

Партнёрства

Сяброўства