Спатканне зняволенаму скараціць цяпер будзе нельга, але пазбавіць - можна

2017 2017-01-26T15:01:22+0300 2017-01-26T15:03:25+0300 be http://spring96.org/files/images/sources/zniavolenyja.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

20 студзеня 2017 года ўступілі ў сілу змены ў Крымінальна-выканаўчы кодэкс Рэспублікі Беларусь.

З іх прыняццем пастаўлена кропка, у прыватнасці, у пытанні вызначэння працягласці кароткатэрміновых спатканняў, якія прадастаўляюцца асуджаным да пазбаўлення волі ў папраўчых установах.

У адпаведнасці з Крымінальна-выканаўчым кодэксам Рэспублікі Беларусь, асуджаным да пазбаўлення волі прадастаўляліся кароткатэрміновыя спатканні працягласцю да чатырох гадзін; такая фармулёўка загадзя заганяе зняволеных у поўную залежнасць у вырашэнні пытання аб працягласці спатканняў ад волі адміністрацыі месцаў пазбаўлення волі. Якіх-небудзь крытэрыяў, па якіх прадстаўнік адміністрацыі мог ўсталёўваць працягласць спаткання, не існавала.

Варта нагадаць, што яшчэ ў 2015 годзе міністр унутраных спраў Беларусі І. Шуневіч увогуле выступіў з ініцыятывай скараціць час спатканняў. Дзіўна, але заканадавец не прыслухаўся да меркавання міністра.

У выніку зараз прадугледжана, што кароткатэрміновае спатканне будзе доўжыцца чатыры гадзіны. Такім чынам, адвольнае скарачэнне спаткання ўжо не будзе грунтавацца на законе.

Гэтае рашэнне важнае з пункту гледжання захавання Беларуссю Мінімальных стандартных правілаў абыходжання са зняволенымі, якія прадугледзелі, што зняволеным варта даваць магчымасць мець зносіны праз рэгулярныя прамежкі часу і пад належным наглядам з іх сем'ямі або з сябрамі, якія карыстаюцца незаплямленай рэпутацыяй, як у парадку перапіскі, так і ў ходзе наведванняў; асаблівую ўвагу трэба надаваць падтрыманню і ўмацаванню сувязяў паміж зняволеным і яго сям'ёй, якія ўяўляюцца пажаданымі і служаць інтарэсам абодвух бакоў; з самага пачатку адбыцця тэрміну зняволення варта думаць пра будучыню, якая чакае зняволенага пасля яго вызвалення. Таму яму варта дапамагаць падтрымліваць і ўмацоўваць сувязі з асобамі або ўстановамі, якія знаходзяцца за сценамі ўстановы, якія здольныя абараняць інтарэсы яго сям'і і спрыяць яго ўключэнні ў жыццё грамадства пасля вызвалення.

Аднак, на гэтым паслабленні для зняволеных папраўчых калоній і турмаў гэтымі папраўкамі вычарпаныя. Па-ранейшаму, адміністрацыя папраўчай установы мае права пазбавіць асуджанага спаткання ў выглядзе дысцыплінарнага спагнання. Новай з'яўляецца ідэя заканадаўца пазбаўляць магчымасці кароткатэрміновага спаткання асуджаных на перыяд знаходжання ў штрафных ізалятарах (раней гэта перашкаджала толькі доўгатэрміновым спатканням).

Зняволеныя выхаваўчай калоніі (там утрымліваюцца непаўналетнія зняволеныя і некаторая колькасць зняволеных, якія сталі паўналетнімі ў перыяд адбыцця пакарання ў гэтай калоніі) нарэшце атрымалі права на працяглыя спаткання з блізкімі сваякамі: такіх спатканняў можа быць прадастаўлена да чатырох у год; ім таксама павялічана да васьмі ў год колькасць кароткатэрміновых спатканняў.

Апошнія навіны

Партнёрства

Сяброўства