viasna on patreon

“Крэпасць Еўропа. Усходні бастыён”: праблема бежанцаў праз прызму мастацтва

2016 2016-12-05T13:55:59+0300 2016-12-05T14:09:39+0300 be https://spring96.org/files/images/sources/krepost_europa_web.png Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Выстава “Крэпасць Еўропа. Усходні бастыён”, прысвечаная праблеме бежанцаў, адкрыецца ў Берасцейскай арт-прасторы  КХ  8 снежня.

Галоўная тэма выставы – становішча бежанцаў з Паўночнага Каўказу на беларуска-польскай мяжы, сталася вынікам калабарацыі паміж мастакамі, куратарамі і валантэрамі праваабарончай установы “Human Constanta”.

Напачатку верасня Human Constanta разгарнула ў горадзе гуманітарную і праваабарончую місію па працы з бежанцамі. Адным з кірункаў дзейнасці ініцыятывы сталіся распаўсюд інфармацыі і асвета: прыцягненне ўвагі беларускай, польскай і міжнароднай грамадскасці да праблемы і спрыянне найхутчэйшаму яе вырашэнню, што з’яўляецца адной з важных задачаў місіі.

З гэтай нагоды вялася сумесная праца з прадстаўнікамі мастацкай супольнасці, вынікам якой сталася гэтая выстава. Мастацтва, якое заўжды было ня толькі эстэтызацыяй рэчаіснасці, але і сродкам камунікацыі, сёння ўсё часцей звяртаецца да сацыяльна-палітычнай тэматыкі і можа з’яўляцца дзейсным сродкам для дасягнення зменаў у грамадстве.

Серыя партрэтаў Аляксандра Васюковіча паказвае бежанцаў з Чачні і іхны брэсцкі побыт, чаканне патрэбнага цягніка, якое неверагодна зацягнулася, жыццё на здымнай кватэры ці на вакзале. Відэа Максіма Сарычава на сінтэззе актывізму і відэа-арту па сутнасці з’яўляецца дакументацыяй валантэрскай актыўнасці. Аляксей Талстоў аналізуе выказванні польскіх афіцыйных асобаў, бежанцаў і праваабаронцаў і стварае на іх аснове самастойны тэкставы матэрыял. Яшчэ адным экспанатам, які куратары ўключылі ў экспазіцыю, з’яўляюцца працы Марыны Напрушкінай з праекту “Бібліятэка ўцекача”, серыя сшыткаў з ілюстрацыямі судовых працэсаў па заявах на атрыманне прытулку ў Нямеччыне.

Акрамя таго, на выставе будуць прадстаўленыя справаздачы і звароты ўстановы “Human Constanta”, а таксама дакументацыя акцый, якія праводзілі валантэры місіі.

Удзельнікі: Аляксандр Васюковіч, Марына Напрушкіна, Максім Сарычаў, Аляксей Талстоў, валантэры праваабарончай місіі ўстановы “Human Constanta”.

Куратары выставы: Ілона Дзяргач і Аляксей Талстоў.

Human Constanta запрашае вас на адкрыццё выставы “Крэпасць Еўропа. Усходні бастыён” 8 снежня а 19-й гадзіне у прастору КХ (Брэст, вул. Халтурына, 2/1).

Выстава будзе працаваць з 8 па 22 снежня паводле графіку: чацвер, пятніца: 17:00 - 19:00; субота, нядзеля: 15:00 - 19:00

Апошнія навіны

Партнёрства

Сяброўства