Прызначана дата суда над Дзмітрыем Паліенкам

Стала вядома, што суд над Дзмітрыем Паліенкам пачнецца 11 кастрычніка ў 10.00 у судзе Цэнтральнага раёна г. Мінска. Справу разглядаць будзе суддзя Валеры Есьман.

Судзіць хлопца будуць па арт. 364 Крымінальнага кодэкса “Гвалт або пагроза ўжывання гвалту ў дачыненні да супрацоўніка органаў унутраных спраў”, за які прадугледжана адказнасць у выглядзе арышту, абмежавання волі на тэрмін да пяці гадоў, або пазбаўлення волі на тэрмін да шасці гадоў. Акрамя гэтага, праваабаронцам з ліста ад Дзмітрыя Паліенкі стала вядома, што дадаткова яго абвінавачваюць па ч.2 арт. 343 КК РБ “Выраб і распаўсюджванне парнаграфічных матэрыялаў або прадметаў парнаграфічнага характару”, па якім хлопцу паграджае пазбаўленне волі на тэрмін ад двух да чатырох гадоў.

Адносна непрапарцыйнасці затрымання Дзмітрыя Паліенкі падчас акцыі “Крытычная маса” і абвінавачання па арт.364 праваабронцамі была прынятая адпаведная заява. Што тычыцца новага абвінавачання і іх у сукупнасці - пазыцыя праваабронцаў адносна статусу хлопца будзе сфармуляваная па выніках маніторынгу судовага парцэсу над ім.

Між тым, крымінальны пераслед у дачыненні да Станіслава Канавалава быў спынены 24 жніўня, верагодна ён будзе выступаць у судзе ў якасці сведкі.

Нагадаем, жорсткае затрыманне веласіпедыстаў-удзельнікаў "Крытычнай масы" адбылося ўвечары 29 красавіка. У выніку грубых дзеянняў АМАПа, было затрымана 6 чалавек, якіх моцна зьбілі і адвезьлі ў РУУС Цэнтральнага раёна. Пазней чацвёра з затрыманых падпісалі пратаколы аб парушэнні правілаў дарожнага руху і аказанні супраціўлення супрацоўнікам органаў унутраных спраў і ДАІ, а супраць дваіх былі распачатыя крымінальныя справы.

Затрыманаму Дзмітрыю Паліенку вечарам 6 траўня 2016 года прад’явілі абвінавачванні.

Праваабарончы цэнтр “Вясна” праінфармаваў Працоўную групу па адвольных затрыманнях ААН пра справу раварыста.

Падтрымаць лістамі вязня можна па адрасе: 222160, Мінская вобласць, г. Жодзіна, вул. Савецкая, 22а, СІЗА-8, Паліенку Дзмітрыю Аляксандравічу.