Яшчэ дзве забароны на святкаваньне Дня Волі атрымалі віцебскія актывісты
Адміністрацыі Першамайскага і Чыгуначнага раёнаў забаранілі праводзіць святочныя пікеты пецярым сябрам КХП БНФ, якія звярталіся з заяўкамі да мясцовых уладаў.
Актывісты хацелі правесці пікеты 25 сакавіка з 15 да 16 гадзін у тых месцах, якія адмыслова вызначаны мясцовымі ўладамі для правядзення вулічных мерапрыемстваў. Прычынай для забароны стала адсутнасць дамоваў “на абслугоўванне акцый” са службай ЖКГ, гарадской паліклінікай і ўправай МУС, кажа адзін з заяўнікаў Ян Дзяржаўцаў:
“Забарона была прадказальнай і традыцыйна грунтавалася на тым, што мы не выканалі патрабаванне рашэння Віцебскага гарвыканкама наконт арганізацыі і правядзення масавых мерапрыемстваў. Гэта невыканальнае рашэнне, бо заключыць дамовы з адмыслоўцамі немагчыма. Ужо сёмы год, колькі дзейнічае прынятае рашэнне ад 10 ліпеня 2009 года №881 “Аб масавых мерапрыемствах у горадзе Віцебску”, нам ніводнага разу не далі дазволу на ўвасабленне нашых ініцыятываў. Бо ад заключэння дамоваў ухіляюцца адказныя службоўцы, і нам не ўдалося змусіць іх да супрацоўніцтва нават праз суд”.
Па той самай прычыне - праз адсутнасць дамоваў “на абслугоўванне акцый” днямі быў забаронены і ўрачысты сход, які хацелі правесці актывісты Партыі БНФ. Прадстаўнікі дэмакратычнай грамадскасці горада вырашаюць, якім чынам можна адзначыць Дзень Волі, не трапіўшы пад суд за арганізацыю несанкцыянаваных акцый або ўдзел у іх.
