У Гомелі працягваецца хваля пераследу фрылансераў
Фота Радыё Свабода
Як стала вядома, на карэспандэнта-фрылансера з Гомеля Кастуся Жукоўскага, сябры Беларускай асацыяцыі журналістаў (БАЖ) склалі два адміністрацыйныя пратаколы (Кармянскі і Калінкавічскі РАУСы) за нібыта парушэнне арт. 22.9 КаАП (незаконны выраб і распаўсюд прадукцыі СМІ). На падыходзе яшчэ і трэці пратакол, так як 6 студзеня Кастуся па тэлефоне запрасілі ў Веткаўскі РАУС.
Як вынікае з пратаколаў, якія карэспандэнт атрымаў поштай, яны былі складзены 28 снежня маёрам Калінкавічскага РАУС Уладзімірам Паўловічам і 29 снежня маёрам Кармянскага РАУС Аляксандрам Марозавым. У абодвых выпадках, так як і ўчора, спадара Жукоўскага выклікалі для складання пратаколаў па тэлефоне і напярэдадні свят.
Сюжэты, у вырабе якіх абвінавачваюць карэспандэнта, былі прысвечаны праблемам адсутнасці вады ў райцэнтры Карма, а таксама пераследу з боку міліцыі футбольных заўзятараў у Калінкавічах і выйшлі у эфіры тэлеканала “Белсат”. У Ветцы фрылансер здымаў сюжэты аб крызізным становішчы на мясцовых малаказаводзе ды ткацкай фабрыцы.
Агулам на працягу 2015 году спадар Жукоўскі атрымаў па рашэннях розных судоў штрафаў у агульным памеры на 31,5 мільёна рублёў за прафесійную дзейнасць - «незаконны выраб прадукцыі СМІ» (артыкул 22.9 КаАП).
Юрыст Беларускай асацыяцыі журналістаў (БАЖ) у Гомельскім рэгіёне Леанід Судаленка лічыць, што пераслед фрылансераў, якія актыўна збіраюць і распаўсюджваюць інфармацыю аб рэальным жыцці людзей у гарадах і вёсках рэгіёну, наўпрост паказвае стаўлення ўладаў да ітакой ініцыятывы.
“Чыноўнікам не падабаецца, калі пра іх пішуць і паказваюць рэальныя рэчы. За два апошнія дзесяцігоддзі яны, відаць, настолькі прызвычаіліся да лакіроўкі сытуацыі, што працаваць у іншых умовах проста ня ў стане! Любое крытычнае слова, а тым больш відэа, абстаўлены такім занакадаўчым частаколам, што за ім ня бачна ўжо сутнасці абазначанай праблемы. Застаецца толькі забарона – гэтага нельга, тое не дазволена. Ніхто ж не падвяргае сумневу праўдзівасьць інфармацыі таго ж Жукоўскага – усе толькі цьвердзяць: ня меў права”, - падкрэсліў праваабаронца.
4 студзеня адміністрацыйны пратакол за нібыта парушэнне арт. 22.9. КаАП (незаконны выраб і распаўсюд прадукцыі СМІ) склалі таксама на незалежную журналістку з Гомеля Ларысу Шчыракову. Сюжэт, у вырабе якога абвінавачваюць журналістку, быў прысвечаны праблемам былога гадаванца школы-інтэрната з пасёлка Урыцкі і выйшаў у эфіры тэлеканала “Белсат”.
