Праваабаронца Судаленка vs Мытня: 1:0

2015 2015-10-26T18:30:00+0300 2015-10-26T18:30:00+0300 be http://spring96.org/files/images/sources/sudalenka-leanid-1.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Леанід Судаленка.

Леанід Судаленка.

25 кастрычніка скончыўся тэрмін прыцягнення да адміністрацыйнай адказнасці праваабаронцы Леаніда Судаленкі, супраць якога мытня распачала справу аб непадпарадкаванні законнаму патрабаванню службовай асобы. Два месяцы таму, 25 жніўня, супрацоўнікі мытні знялі праваабаронцу з цягніка «Вільня-Мінск», у прамым сэнсе – вынеслі на руках, каб правесці без дай прычыны асабісты дагляд. Потым яго ж мытня і спрабавала абвінаваціць у парушэнні заканадаўства – непадпарадкаванні законнаму патрабаванню службовай асобы (артыкул 23.4 КаАП). Але прадугледжаныя заканадаўствам два месяцы для прыцягнення да адміністрацыйнай адказнасці прайшлі. 26 кастрычніка Леанід Судаленка накіраваў начальніку Гомельскай мытні заяву, у якой нагадвае пра п. 1 артыкулу 7.6 КаАП, згодна якому адміністрацыйнае спагнанне можа быць накладзена не пазней за два месяцы са дня здзяйснення правапарушэння і таму просіць начальніка мытні вынесці адпаведную пастанову.

Падзеі ж развіваліся так. 25 жніўня праваабаронцу знялі з цягніка на станцыі «Маладзечна». Ужо потым мытнікі патлумачылі свае дзеянні пошукамі ў праваабаронцы «носьбітаў інфармацыі з экстрэмісцкім зместам». 17 верасня Леанід Судаленка атрымаў позву з'явіцца ў Гомельскую мытню, якая па даручэнні Мінскай рэгіянальнай мытні распачала ў дачыненні праваабаронцы адміністрацыйны працэс. У позве мытнікі напісалі, што выклікаюць жыхара Гомеля «у якасці асобы, якую прыцягваюць да адміністрацыйнай адказнасці». Такой фармулёўкай мытнікі парушаюць прэзумпцыю невінаватасці, таму што юрыдычна пісьменна ў дадзеных выпадках выкарыстоўваецца фармулёўка «у якасці асобы, у дачыненні якой вядзецца адміністрацыйны працэс». Вінаватым жа чалавека можа прызнаць толькі суд. На такія, здавалася б, «дробязі», праваабаронца звярнуў увагу і напісаў адпаведную заяву ў транспартную пракуратуру. Пракурор вынес мытні папярэджанне.

23 верасня мытня склала нарэшце адпаведную заканадаўству позву, і Леанід Судаленка з'явіўся па ёй, і падаў 16 пісьмовых хадайніцтваў. Усе іх начальнік аддзелу мытных расследаванняў Гомельскай мытні пакінуў без разгляду. Праваабаронца звярнуўся ў суд са скаргай на тое, што хадайніцтвы былі пакінуты без разгляду. Тым часам у суд перадала матэрыялы і мытня – каб прыцягнуць Леаніда Судаленку да адказнасці «за непадпарадкаванне».

«Мая прававая пазіцыя ў тым, што патрабаванні прайсці асабісты дагляд былі незаконнымі, таму што артыкул 117 Мытнага кодэксу гаворыць аб тым, што асабісты дагляд – гэта выключная мера мытнага кантролю, і выкарыстоўваецца ён у тых выпадках, калі ёсць дастатковыя падставы меркаваць, што асоба хавае ці не выдае забароненыя для перамяшчэння праз мяжу рэчы. Мне ж мытнікі нічога не прапаноўвалі выдаць. Ну падышлі б і сказалі: Леанід Леанідавіч, скіньце з сябе ўвесь экстрэмізм, які вы перамяшчаеце праз мяжу», - пракаментаваў праваабаронца.

20 кастрычніка суддзя Аляксандр Піскуноў прыняў пастанову: накіраваць адміністрацыйную справы на дапрацоўку. 22 кастрычніка Леанід Судаленка кіраваўся ў аэрапорт, каб вылецець за мяжу, і атрымаў sms – маўляў, вам сёння трэба з'явіцца ў суд, што канечне не было магчыма фізічна. Потым выявілася, што sms было даслана не судом, а мытнікамі. Тыя ж прыйшлі ў суд і патрабавалі разгледзець справу без удзелу праваабаронцы, але суддзя адмовіўся гэта рабіць.

Праваабаронца нагадвае, што ён таксама падаў зыск у суд, каб спагнаць з мытнікаў маральную і матэрыяльную шкоду ў памеры 999 мільёнаў рублёў за такія дзеянні, як беспадстаўнае высаджванне з цягніка з прымяненнем фізічнай сілы і правядзенне асабістага дагляду. Леанід Судаленка мае падставы меркаваць, што неаднаразовыя перашкоды, якія чыняць яму з мытнікі ў тым, каб не даць спакойна вярнуцца з-за мяжы на Радзіму (праводзяць асабістыя дагляды, забіраюць тэхніку, носьбіты інфармацыі для праверкі) можна расцаніць як помсту за актыўную грамадзянскую і праваабарончую дзейнасць.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international