Узброенае вока назіральніка – з ласкі выбарчай камісіі

2015 2015-09-21T12:58:33+0300 2015-09-21T12:58:33+0300 be http://spring96.org/files/images/sources/naaziranne-2.jpg

Старшыня Цэнтрвыбаркаму Лідзія Ярмошына адказала на зварот Руху “За Свабоду” датычна правоў назіральнікаў падчас прэзідэнцкай выбарчай кампаніі. З адказу вынікае, што яны будуць абмежаваныя ва ўжыванні відэа- і аўдызапісваючага абсталявання. Карыстацца імі будзе можна толькі з дазволу выбарчых камісій.

У сваім звароце Рух “За Свабоду”, які мае намер вылучыць больш як 200 назіральнікаў за правядзеннем прэзідэнцкіх выбараў, папрасіў Цэнтрвыбаркам удакладніць іх правы і магчымасці.

У прыватнасці, арганізацыю цікавіла “права назіральнікаў мець пры сабе і карыстацца фотаапаратурай, відэа- і аўдыёзапісваючай тэхнікай, а таксама аптычнымі прыстасаваннямі”.

Рух “За Свабоду” намагаўся высветліць, “ці атрымаюць назіральнікі такую магчымасць і ці будзе гэта рэгламентавацца якімі-небудзь афіцыйнымі дакументамі кшталту інструкцый Цэнтральнай камісіі Рэспублікі Беларусі па выбарах і правядзенні рэспубліканскіх рэферэндумаў?”.

Таксама Цэнтравыбаркаму было адрасавана наступнае пытанне: “У выпадку наяўнасці права назіральнікаў на карыстанне ўзгаданым вышэй абсталяваннем ці будзе прадугледжана адказнасць за перашкоды з боку сябраў выбарчых камісій або супрацоўнікаў міліцыі, якія будуць занятыя на ахове правапарадку падчас галасавання?”.

“Аптычныя і відэапрыстасаванні прыдаліся б назіральнікам, бо часта іх саджаюць за стол, размешчаны вельмі далёка ад уласна працэсу галасавання і падліку галасоў. У такіх умовах няўзброеным вокам мала што можна пабачыць”, - пракаментаваў зварот у Цэнтрвыбаркам першы намеснік старшыні Руху “За Свабоду” Юрась Губарэвіч.

Аўдыё- і відэатэхніка, па ягоных словах, “дапамаглі б фіксаваць розныя спрэчныя моманты, у тым ліку звязаныя з выдаленнем назіральнікаў з выбарчага ўчастка нібыта за тое, што яны замінаюць працы выбарчых камісій”.

Апрача таго, выкарыстанне назіральнікамі відэакамер магло б замяніць на шэрагу выбарчых участкаў арганізацыю онлайн-трансляцыі з іх: “З такой ідэяй некаторы час таму выступіла кампанія назірання “Права выбару-2015”, але Цэнтрвыбаркам адмовіў у яе рэалізацыі. Назіральнікі маглі б ладзіць відэафіксацыю стану скрыняў для галасавання, каб была магчымасць схапіць за руку тых, хто ўкідвае бюлетэні ці маніпулюе з яўкай”.

Цэнтрвыбаркам у асобе яго старшыні Лідзіі Ярмошынай адказаў, што ў артыкуле 13 Выбарчага кодэкса Рэспублікі Беларусь змешчаны вычарпальны пералік паўнамоцтваў асобаў, якія з’яўляюцца назіральнікамі: “Такім чынам, названыя Вамі дзеянні выходзяць за рамкі нарматыўных прадпісанняў вышэй названага артыкула, і задавальненне просьбы наглядальніка аб вядзенні фота- і відэаздымкі, а таксама аўдыёзапісу з’яўляецца правам, але не абавязкам выбарчай камісіі”.

Што тычыцца спецыяльных аптычных прыбораў, то “іх выкарыстанне для ажыццяўлення назірання на ўчастку для галасавання выбарчым заканадаўствам не прадугледжана”.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international