Віцебская пракуратура высвятляе, ці бралі ў людзей распіскі "галасаваць за Лукашэнку"

2015 2015-09-18T16:31:25+0300 2015-09-18T16:32:02+0300 be http://spring96.org/files/images/sources/seviarynec_taciana.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Таццяна Севярынец

Таццяна Севярынец

Інфармацыя пра тое, што ў бацькоў вучняў віцебскай сярэдняй школы №38 бралі распіскі з абяцаннем галасаваць на будучых выбарах за Аляксандра Лукашэнку, з'явілася на сайце аргкамітэта па стварэнні партыі БХД. Таццяну Севярынец, чые словы цытаваліся ў артыкуле, выклікалі ў абласную пракуратуру.

Таццяна Севярынец распавяла, што пра распіскі яна пачула ад жанчыны, калі актывісты БХД збіралі подпісы за паляпшэнне медыцынскага абслугоўвання:

"Мне так і распавялі, што ў школе №38 у бацькоў на сходзе бралі распіскі, каб яны галасавалі за Аляксандра Лукашэнку. Я добра памятаю гэта, бо адразу звярнула ўвагу на тэрміны: мне распавядалі пра гэта 8 або 9 верасня – яшчэ да рэгістрацыі кандыдатаў. Таму я пачала прыслухоўвацца да таго, што людзі распавядаюць пра падрыхтоўку да выбараў. Бацькі вучняў школы №12, прыкладам, расказалі, што іх агітавалі галасаваць за Аляксандра Лукашэнку таксама яшчэ задоўга да пачатку агітацыйнай кампаніі. Пра ўсё гэта я паведаміла пракурору Марыне Запрудскай, якая брала ў мяне тумачэнні адносна артыкула пра распіскі на сайце".  

У пракуратуру з просьбай правесці праверку звярнулася абласная выбарчая камісія. Бо туды паступіла паведамленне ад старшыні ўпраўлення адукацыі Віцебскага абласнога выканкама Івана Шчурка, які спасылаўся на скаргі дырэктараў дзвюх віцебскіх школ, згаданых у артыкулах на сайце http://bchd.info. У адным з артыкулаў апавядалася пра распіскі, а ў другім – пра датэрміновую агітацыю і прымус удзельнічаць у выбарах.

"Я распавяла толькі тое, што чула на ўласныя вушы. І гэта, з аднаго боку, добра – што пракуратура праводзіць праверку. Можа, пасля гэтага кіраўнікі навучальных установаў будуць асцерагацца ад незаконных дзеянняў. Бо ў Віцебску падчас ранейшых выбарчых кампаній фіксаваліся выпадкі, калі на працягу тэрміну датэрміновага галасавання арганізоўваліся бацькоўскія сходы, людзям загадвалі прыйсці з пашпартамі і фактычна заганялі на выбарчыя ўчасткі. Кепска, калі цяпер парушэнняў стала яшчэ больш. З другога боку, будзе нядобра, калі гэтыя артыкулы пра віцебскія школы нанясуць нейкую шкоду нашаму сайту", - гаворыць Таццяна Севярынец.

Яна адзначае, што папярэдні досвед дазваляе ёй прыняць на веру словы жыхароў Віцебску і пра распіскі ў школах, і пра настойлівую агітацыю бацькоў. Бо парушэнні такога плану былі і раней, і цяпер: пракладам, нядаўна ў інтэрнэце з'явіліся звесткі пра тое, што студэнтам Полацкага універсітэту пагражаюць вымовамі, калі яны не прыйдуць галасаваць.

“Праваабаронцы за свабодныя выбары”

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international