Не падпішашся за Лукашэнку – не дадзім дазвол на продаж!
Такім метадам карыстаюцца чыноўнікі ў Кармянскім райвыканкаме пры зборы подпісаў у падтрымку прэтэндэнта ў Прэзідэнты Аляксандра Лукашэнку. Пра падобны выпадак паведаміў грамадскі актывіст Аляксей Паўлоўскі.
- Жанчыны, якія стаяць на рынку ў Карме (райцэнтр у Гомельскай вобласці – заўв. рэд.) і прадаюць садавіну і гародніну, распавялі мне, што каб атрымаць даведку аб дазволе на продаж прадуктаў з уласнай сядзібы, трэба падпісацца за Аляксандра Лукашэнку. Калі не падпішашся, то даведку выдаваць чыноўнікі напрач адмаўляюцца, - кажа Аляксей Паўлоўскі.
Грамадскі актывіст адзначае, што гэта бязмежжа вышэйшага ўзроўня. У сувязі з гэтым ён збіраецца пісаць скаргі ў кантралюючыя дзяржаўныя органы.
Нагадаем, што ў Беларусі зафіксаваны дзясяткі выпадкаў, калі звычайныя грамадзяне паведамляюць пра збор подпісаў з выкарстаннем адміністрацыйнага рэсурсу.
