Юры Рубцоў: колькасць прагулак абмяжоўваецца, а ежа - нізкай якасці

2015 2015-08-04T09:59:57+0300 2015-08-04T09:59:57+0300 be http://spring96.org/files/images/sources/rubcou-5.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Юрый Рубцоў у судзе Пружанаў. Фота ПЦ "Вясна".

Юрый Рубцоў у судзе Пружанаў. Фота ПЦ "Вясна".

Палітзняволены Юры Рубцоў паведаміў жонцы, якая яго наведвала ў СІЗА г. Баранавічы аб тым, што колькасць прагулак неабгрунтавана абмяжоўваецца, зняволеным даюць ежу нізкай якасці.

На вялікі жаль, аб праблемах многіх месцаў пазбаўлення волі грамадскасць даведаецца толькі тады, калі туды трапляе хто-небудзь з палітвязняў і, не баючыся пераследу з боку адміністрацыі, робіць здабыткам галоснасці тыя парушэнні, якія там сталі ўжо нормай. Мне адразу ўспомнілася размова з Паўлам Вінаградавым, які апісваў  ўмовы ўтрымання ў Баранавіцкім СІЗА: жудаснае перанасяленне, асабліва так званых транзітных камер, дзе ўтрымліваюцца зняволеныя ў чаканні накіравання ў калоніі (у 2012 годзе ў пісьмовым адказе начальнік СІЗА запэўніваў, што гэта часовая з’ява), нізкая якасць харчавання, незадавальняючы стан памяшканняў, пацукі. Відавочна, што становішча там не змянілася да гэтага часу.

Якімі правамі валодаюць зняволеныя СІЗА? 

Правы зняволеных СІЗА ўстаноўлены Правіламі ўнутранага распарадку следчых ізалятараў крымінальна-выканаўчай сістэмы Міністэрства ўнутраных спраў Рэспублікі Беларусь. Правілы закліканы забяспечваць правы і законныя інтарэсы асоб, якія ўтрымліваюцца пад вартай, а таксама выкананне імі сваіх абавязкаў.

Асобам, якія ўтрымліваюцца пад вартай, штодня прадастаўляецца трохразовае харчаванне, на перыяд утрымання ў СІЗА яны забяспечваюцца для індывідуальнага карыстання: спальным месцам; пасцельнымі прыналежнасцямі (матрац, падушка, коўдра); пасцельнай бялізнай (дзве прасціны, навалачка); рушніком; сталовым посудам і сталовымі прыборамі (міска, кружка, лыжка);сродкамі асабістай гігіены па нормах.
Камеры СІЗА абсталююцца: сталом і лаўкамі з колькасцю пасадачных месцаў па колькасці месцаў у камеры; аддзеленым санітарным вузлом; рукамыйнікам і кранам з вадаправоднай вадой; шафай для прадуктаў; вешалкай для верхняй адзення; паліцай для туалетных прыладаў; насценным люстэркам; бачком для пітнай вады; радыёпрымачом; кошам для смецця; свяцільнямі дзённага і начнога асвятлення; вентыляцыйным абсталяваннем;
Пры адсутнасці ў камеры воданагравальных  прыбораў альбо гарачай вадаправоднай вады вада для гігіенічных мэтаў і кіпячоная вада для піцця выдаецца штодня ў вызначаны час з улікам патрэбы.
Не радзей за адзін раз у тыдзень асобам, якія ўтрымліваюцца пад вартай, прадастаўляецца магчымасць памыцца ў душы працягласцю не менш за 15 хвілін. Змена пасцельнай бялізны ажыццяўляецца штотыдзень пасля памыўкі ў душы.
Асобы, якiя ўтрымлiваюцца пад вартай, карыстаюцца штодзённым шпацырам працягласцю не менш за дзве гадзіны. Працягласць прагулкі усталёўваецца начальнікам СІЗА з улікам распарадку дня, метэаралагічных умоў, напаўнення СІЗА і іншых абставінаў. Прагулка прадастаўляецца асобам, якія ўтрымліваюцца пад вартай, пераважна ў светлы час сутак. Час вываду на шпацыр асоб, якiя ўтрымлiваюцца ў розных камерах, усталёўваецца па графіку. Час вываду з камер, перамяшчэння па тэрыторыі СІЗА і вяртання ў камеры ўключаецца у час прагулкі.
Прагулка праводзіцца на тэрыторыі прагулачных двароў СІЗА. Прагулачныя двары абсталююцца лаўкамі для сядзення і навесамі ад дажджу. Прагулка можа быць адменена або скарочана начальнікам СІЗА па заключэнні начальніка медыцынскай часткі СІЗА з улікам метэаралагічных умоў. На шпацыр выводзяцца адначасова ўсе асобы, якiя ўтрымлiваюцца ў камеры. Вызваленне ад прагулкі даецца толькі медыцынскім работнікам СІЗА.

Павал Сапелка для palitviazni.info

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international