Гомельскі абласны суд не задаволіў скаргу «Справядлівага свету» на неўключэнне ў абласную камісію сябра партыі

2015 2015-07-23T15:37:17+0300 2015-07-23T15:37:17+0300 be http://spring96.org/files/images/sources/sudy-3.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Гомельскі абласны суд 23 ліпеня разгледзеў скаргу старшыні абласнога камітэту Беларускай партыі левых «Справядлівы свет» Уладзіміра Сякеркі на дзеянні прэзідыуму Гомельскага аблвыканкаму і абласнога Савету дэпутатаў, якія пры стварэнні абласной выбарчай камісіі не ўключылі ў яе склад прадстаўніка партыі Віктара Хоміча. Уладзімір Сякерка прасіў суд прызнаць дзяржаўных органаў незаконнымі, прыняць новае рашэнне аб стварэнні камісіі і ўключыць у яе склад Віктара Хоміча.

Ад аблвыканкаму і абласнога Савету дэпутатаў на паседжанні прысутнічалі начальнік галоўнага ўпраўлення арганізацыйна-кадравай працы аблвыканкаму Дзмітрый Ражкоў і намеснік начальніка аддзелу арганізацыйнага забеспячэння, працы з органамі кіравання і мясцовага самакіравання упраўлення арганізацыйна-кадравай працы аблвыканкаму Тамара Сівуха. Яны прасілі суд не задавальняць скаргу і даводзілі, што абласная выбарчая камісія створана цалкам законна, празрыста і дэмакратычна.

Адным з крытэраў уключэння ў камісію быў досвед працы ў выбарчых камісіях. Уладзімір Сякерка нагадаў, што Віктар Хоміч з'яўляўся дэпутатам Вярхоўнага Савету 13 склікання, дэпутатам абласнога савету і працаваў у розных камісіях. «Гэта прынцыповы, патрабавальны чалавек, які не дапусціў бы парушэнняў заканадаўства пры працы выбарчай камісіі. Таму, я лічу, яго і не ўключылі. Таму і ўзнікаюць сумненні наконт дэмакратычнасці і празрыстасці выбарчай кампаніі», - адзначыў рэгіянальны лідар «Справядлівага свету».

Тамара Сівуха адзначыла на судзе, што на ўключэнне ў камісію прэтэндавалі 24 чалавекі, а ўключылі 13 чалавек, большасць з якіх – 8 чалавек, па яе словах – прадстаўнікі грамадскасці. «Мы ўключылі восем чалавек, каб максімальна прадставіць у камісіі грамадзянскую супольнасць. Па заканадаўстве павінна быць грамадскасці не менш за траціну камісіі, а мы нават больш уключылі. У на дзяржаўных служачых у камісіі толькі два чалавекі», - патлумачыла чыноўнік.

Яна дадала, што пры рашэнні – уключаць таго ці іншага чалавека ў склад камісіі, на кожнага прэтэндэнта ўважліва разглядалася яго характарыстыка. «А дзе вы ўзялі характарыстыку на Віктара Хоміча, каб яе вывучаць?», - пацікавіўся Уладзімір Сякерка. Тамара Сівуха парыравала, што ўлічвалі «грамадскае меркаванне», а яе начальнік Дзмітрый Ражкоў дадаў, што інфармацыю пра кандыдатаў на ўключэнне ў камісію члены прэзідыуму глядзелі ў тым ліку і ў інтэрнэце. «Было пададзена 24 кандыдатуры, і ўсе яны, амаль усе – годныя людзі. Мы нічога благога не казалі пра вашага прэтэндэнта», - падкрэсліў начальнік галоўнага ўпраўлення арганізацыйна-кадравай працы. Ён дадаў, што не ўключылі ў камісію не толькі Віктара Хоміча, але і іншых годных людзей – з ветэранскай арганізацыі, прафсаюзу і так далей.

Чыноўнікі папікнулі Уладзіміра Сякерку, што ён не прысутнічаў на паседжанні па стварэнні абласной камісіі, бо «вы маглі б там узяць слова і даць добрую характарыстыку Віктару Хомічу». Хаця які б гэта мела плён, калі, па словах супрацоўнікаў аблвыканкаму, асобы прэтэндэнтаў на ўключэнне ў камісію абмяркоўваліся загадзя «працоўнай групай», якая і падрыхтавала спіс з 13 чалавек, прадстаўлены потым на зацвярджэнне на паседжанні.

Дзмітрый Ражкоў дадаў, што орган, які стварае камісію, не абавязаны даваць тлумачэнні з нагоды уключэння ці неўключэння таго ці іншага грамадзяніна ў камісію. «Было 24 прэтэндэнты, уключылі 13, канечне, нехта застанецца незадаволены», - адзначыў начальнік упраўлення.

Суд вынес рашэнне: скаргу пакінуць без задавальнення.

Выклікаюць сумневы сцверджанні чыноўнікаў на судзе пра толькі дваіх дзяржаўных служачых у камісіі. Напрыклад, прадстаўнікі «грамадскасці» («Белай Русі» і «Беларускага саюзу жанчын») Павел Ждановіч і Галіна Саланец працуюць дырэктарам дзяржаўнага музею ваеннай славы і дырэктарам дзяржаўнага медыцынскага каледжу. Ад «грамадзян» прайшлі ў абласную камісію намеснік начальніка галоўнага ўпраўлення арганізацыйна-кадравай працы аблвыканкама Тамара Лук'яненка, галоўны ўрач шпіталю ветэранаў вайны Алег Іванцоў і намеснік начальніка ўпраўлення юстыцыі аблвыканкама Ала Сусарэнка. Яшчэ адны прадстаўнікі «грамадскасці, грамадзян і працоўных калектываў» - дырэктар унітарнага прадпрыемства «Гомельвторчермет» Мікалай Чарныш, памочнік генеральнага дырэктара РСУП «Гомельгосплемпредприятие» Аляксандр Старацітараў і дырэктар філіялу «Белдзяржстраху» Мікалай Стош.

“Праваабаронцы за свабодныя выбары”

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international