“Брэстаблсаюдрук” у чарговы раз адмовіўся распаўсюджваць незалежную газету
З просьбай заключыць дамову на карыстанне дзяржаўнай сістэмай продажу выданняў праз шапікі і крамы, што належаць УП “Брэстаблсаюздрук”, звярнулася рэдакцыя баранавіцкай газеты “Intex-press”.
Аднак з ліста за подпісам намесніка дырэктара прадпрыемства Мікалая Марэйкі, дасланым на адрас ТАА “Выдавецкі дом “Інтэкс-прэс”, гаворыцца, што “Брэстаблсаюдруку” нібыта няма зараз магчымасцяў скласці такую дамову. Дакладныя прычыны, чаму гэта нельга зрабіць, у лісце не паведамляюцца.
Варта нагадаць, што папулярная ў Баранавічах недзяржаўная грамадска-палітычная газета “Intex-press”, якая існуе жо больш за 20 гадоў, была выключана з дзяржаўных сістэм распаўсюду яшчэ ў 2006 годзе. З таго часу рэдакцыя рэгулярна звяртаецца да адпаведных устаноў з просьбамі аднавіць гэты распаўсюд, але пакуль атрымоўвае адмоўныя адказы.
