Мінскія чыноўнікі адмовілі ў правядзенні мітынга
Мінгарвыканкам у трэці раз адмовіў грамадзянам у правядзенні мітынга ў парку ім.Дружбы народаў. Акцыю збіраліся правесці дольшчыкі, якія пацярпелі ад сталічнай будаўнічай кампаніі “Валынь”, якая будуе дом па вуліцы Валгаградская.
Будаўніцтва дома пачалося яшчэ ў 2009 годдзе, аднак на дадзены момант будоўля стала на ўзроўні трэцяга паверха, і ніякая праца на аб’екце не вядзецца. Фірма, якая будавала дом, аказалася фінансава няздольнай.
Стомленыя шматгадовай перапіскай з забудоўшчыкам, а таксама з мясцовымі чыноўнікамі грамадзяне адважыліся на мітынг, каб з дапамогай яго прыцягнуць увагу да праблемы.
- Мы планавалі правядзенне мерапрыемства 15 траўня, аднак атрымалі адмову ад Мінгарвыканкаму. Прычына адмовы простая – у той дзень у парку было запланава іншае мерапрыемства. Раней нам адмаўлялі па прычыне таго, што там праходзіў суботнік, а таксама што мы не пазначылі абавязальніцтвы асобы, якая была адказная за правядзенне мітынга. Мы чакаем яшчэ два адказы на дзве пададзеныя намі заяўкі, - кажа адзін з ініцыятараў мітынга Сяргей Шунько.
Ён адзначае, што мітынг быў заяўлены на 200 чалавек, і столькі сабраць цалкам магчыма, бо людзей, якія пацярпелі ад будаўнічай фірмы “Валынь”, вельмі шмат.
Шунько таксама кажа, што ў чыноўнікаў з Мінгарвыканкама няма ніякага рашэння іх пытання, бо яны не могуць памяняць забудоўшчыка, паколькі будавалі жыллё не за грошы, а за аблігацыі.
Тым часам стала вядома, што на дырэктара ААТ “Валынь” Каваленка, а таксама на камерцыйнага дырэктара Собалева заведзены крымінальныя справы. 23 красавіка ім прад’яўлены абвінавачанні па ч.2 артыкулу 210 Крымінальнага кодэкса “Крадзёж шляхам злоўжывання службовымі паўнамоцтвамі”. Абодва змешчаны пад варту.
