За рэдактара “Вольнага горада” ўзяліся падаткавікі

2015 2015-02-22T00:00:35+0300 2015-02-22T00:00:35+0300 be http://spring96.org/files/images/sources/niarouny-siargej-krych.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Сяргей Няроўны.

Сяргей Няроўны.

Рэдактар крычаўскай маланакладнай газеты “Вольны горад” Сяргей Няроўны атрымаў патрабаванне ад інспекцыі Міністэрства па падатках і зборах па Крычаўскаму раёну прадставіць дэкларацыю аб даходах і маёмасці за 2011, 2012, 2013, 2014 гады ў тэрмін не пазней за 24.02.2015 г.

У патрабаванні паведамляецца пра тое, што дэкларацыя можа быць прадстаўлена Сяргеем Няроўным асабіста, па пошце альбо праз асабістага прадстаўніка. У выпадку немагчымасці прадастаўлення дэкларацыі аб даходах і маёмасці ва ўстаноўлены тэрмін журналіст абавязаны не пазней, чым за тры каляндарныя дні да надыходу ўказанага ў пісьмовым патрабаванні тэрміну падаць у падаткавы орган заяву з указаннем прычын яе непрадастаўлення.

Сяргей Няроўны лічыць, што праз падаткавую інспекцыю ўлады хочуць націснуць на яго як рэдактара газеты “Вольны горад” з мэтай змяніць крытычную пазіцыю выдання ў адносінах да мясцовай “вертыкалі” на больш лагодную.

“Я лічу, што патрабаванне з падаткавай аб прадастаўдленні мной дэкларацыі аб даходах і маёмасці за чатыры гады – гэта такая своеасаблівая помста з боку Крычаўскага райвыканкама за крытычную пазіцыю газеты “Вольны горад”, - кажа Сяргей Няроўны. – Немалаважна таксама, што ў гэтым годзе адбудуцца выбары прэзідэнта нашай краіны, напярэдадні такіх падзей у нас традыцыйна павялічваецца ціск на незалежных журналістаў. Наколькі я ведаю, за патрабаваннем падаткавай аб прадастаўленні мной дэкларацыі аб даходах за чатыры гады стаіць начальнік Крычаўскага межрайаддзела КДБ Краўцоў, які не так даўно стаў чальцом Крычаўскага райвыканкама, і дзейнасць якога мы зараз крытыкуем у газеце “Вольны горад”.

Па словах Сяргея Няроўнага, апошні раз падаткавая інспекцыя спрабавала на яго націснуць у 2011 годзе, “калі выгналі з працы жонку і адразу даслалі патрабаванне з падатковай аб прадастаўленні дэкларацыі аб даходах. Тады здолеў адбіцца... Паглядзім, як атрымаецца зараз”.

Нагадаем, што восенню мінулага года ў судзе Крычаўскага раёна праходзілі судовыя працэсы, на якіх разглядаўся пазоў аб абароне гонару, годнасці, дзелавой рэпутацыі начальніка аддзела ідэалогіі, культуры і па справах моладзі Крычаўскага райвыканкама Марыны Максімавай да газеты “Вольны горад”, яе рэдактара Сяргея Няроўнага і выдаўца газеты Уладзіміра Кудраўцава.

Па выніках разгляду пазова суддзя суда Крычаўскага раёна Алена Азаранка 8 снежня 2014 года вынесла рашэнне спагнаць з журналістаў газеты “Вольны горад” - яе выдаўца Уладзіміра Кудраўцава, рэдактара Сяргея Няроўнага і журналіста Мікалая Гердзія кампенсацыю за нанесеныя Марыне Максімавай маральныя страты ў памеры 7 000 000 рублёў, аплачанай ёй дзяржпошліны ў памеры 450 000 рублёў, і выдаткаў, звязаных з удзелам яе прадстаўніка ў судзе ў памеры 3 600 000 рублёў.

Газета “Вольны горад” выдаецца з 1998 года і карыстаецца шырокай папулярнасцю сярод насельніцтва ўсходніх рэгіёнаў Магілёўскай вобласці. Яна распаўсюджваецца накладам у 299 асобнікаў, бо зарэгістраваць газету, нягледзячы на неаднаразовыя спробы, журналісты не змаглі, мясцовыя ўлады заўсёды выступалі супраць такой рэгістрацыі. Увесь гэты час узначальвае рэдакцыю газеты вядомы крычаўскі журналіст Сяргей Няроўны.

 

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international