РУУС Цэнтральнага раёна: перашкодаў да доступу на выяздныя судовыя паседжанні не было
Кулакоў Леанід
11 лютага прыйшоў адказ на заўвагу, ўнесенную Леанідам Кулаковым ў кнігу заўваг і прапаноў РУУС Цэнтральнага раёна г. Мінска.
23 студзеня, падчас выяздных судоў у Цэнтральным РУУС над удзельнікамі ўшанавання памяці ўкраінскай “Нябеснай сотні”, прысутных не пускалі ні ў будынак РУУС, ні на самі паседжанні. Заклапочаныя лёсам аднадумцаў, людзі прыйшлі падтрымаць іх на судзе, але патрапіць туды так і не змаглі. Спачатку іх выганяў дзяжурны супрацоўнік дзяржаўнай установы, а потым і сам начальнік РУУСа – Артур Шахлай.
Леанід Кулакоў дамогся таго, каб напісаць заўвагу ў кнігу заўваг і прапаноў на дзеянні супрацоўнікаў Цэнтральнага РУУС. Больш нікому з прысутных такой магчымасці не далі. Прапаршчык міліцыі за каўнер паліто выставіў вонкі юрыста Праваабарончага цэнтру “Вясна” Насту Лойку, калі тая ў сваю чаргу прасіла кнігу заўваг і прапаноў. Каля двадцаці чалавек стаялі на марозе некалькі гадзінаў, чакаючы вынікаў разгляду адміністратыўных спраў.
Праз 15 дзён быў дадзены адказ на заўвагу Леаніда Кулакова за подпісам самаго А.Шахлая. Так, у сваім адказе ён адзначае, што “ў ходзе праверкі было ўстаноўлена, што 23.01.2015г., у памяшканні УУС адміністрацыі Цэнтральнага раёна г.Мінска, праводзіўся разгляд спраў па адміністрацыйных правапарушэннях, прадугледжанных арт. 23.34 КаАП, якія праходзілі ў выяздным судовым паседжанні, з удзелам асобаў, у дачыненне якіх праводзіўся адміністрацыйны працэс, і іх адвакатаў. Перашкодаў да доступу ў зал, дзе адбываліся судовыя паседжанні, не ўстаноўлена”.
Такім чынам, А. Шахлай, які сам выганяў людзей з будынку РУУС, не прызнае сваіх супрацьпраўных дзеянняў і не бачыць парушэнняў правоў прысутных каля РУУС грамадзян.
Леанід Кулакоў не задаволены такім адказам і збіраецца звярнуцца са скаргай ў Службу ўнутраннай бяспекі МУС.
“Калі супрацоўнікі РУУС лічаць, што ў кнізе заўваг і прапаноў мной напісаны паклёп, то няхай мяне прыцягваюць да адказнасці”, - зазначыў ён.
Нагадаем, 9 чалавек было затрымана пасля акцыі ўшанавання памяці ўкраінскай “Нябеснай сотні”. Чатырох з іх абвінавацілі ва ўдзеле ў несанкцыянаваным масавым мерапрыемстве і асудзілі да 10 і 15 сутак арышту.
