Ніна Багінская скардзіцца на зняважлівыя дзеянні супрацоўнікаў міліцыі ў пракуратуру
Ніна Багінская. Фота tut.by.
Актывістка Ніна Багінская, затрыманая 22 студзеня пад час ушанавання памяці герояў «Нябеснай сотні» у Менску, абскардзіла грубыя і зняважлівыя дзеянні супрацоўнікаў Цэнтральнага РУУС г. Мінска ў раённай пракуратуры.
У сваёй скарзе Багінская інфармуе пракуратуру Цэнтральнага раёна Менска, што затрыманне ўсіх удзельнікаў ускладання кветак ажыцяўлялі супрацоўнікі міліцыі як у форме, так і ў цывільным. Усіх пасадзілі ў аўтобус і даставілі ў РУУС Цэнтральнага р-на г. Мінска. Там, нягледзячы на мой ўзрост (Багінскай – амаль 68 год), паставілі тварам да сцяны, адабралі кіёк. На просьбы аддаць яго жанчыне і дазволіць сесці супрацоўнікі міліцыі не рэагавалі. Затым супрацоўнікі міліцыі завялі Багінскую ў пакой для затрыманых у дзяжурнай частцы.
У скарзе Ніна Багінская піша: “Пасля таго як у адносінах да мяне зрабілі відэафіксацыю, адзін з супрацоўнікаў Цэнтральнага РУУС г. Мінска прапанаваў азнаёміцца з пратаколамі адміністратыўнага правапарушэння. На мае заўвагі, што я не разумею пратаколы, складзеныя па-руску, ён пачаў абражаць мяне грубай нецэнзурнай лаянкай, абражаў мой чалавечы годнасць і гонар. На мае заўвагі супрацоўнік адрэагаваў пагрозамі фізычнай расправы ў мой адрас. У прыватнасці ён сказаў, што я ўжо старая і мяне пара ўжо закапаць і што ён гэта зробіць. Гэты супрацоўнік міліцыі быў без бэджа з указаннем ягонага прозвішча. Пры гэтай размове прысутнічалі іншыя адміністратыўна затрыманыя, што знаходзіліся ў той дзень у дзяжурным пакоі Цэнтральнага РУУС г. Мінска”.
Нінга Багінская лічыць, што сваімі дзеяннямі дадзены супрацоўнік міліцыі дапусціў абразу яе чалавечай годнасці і гонару.
"Згодна з арт. 4 Закона Рэспублікі Беларусь “Аб органах унутраных спраў” ад 17.06.2007 № 263-3, аднымі з прынцыпаў дзейнасці органаў унутраных спраў з’яўляецца павага і абарона правоў, свабод і законных інтарэсаў грамадзян і гуманізм. Лічу, што супрацоўнік міліцыі ў дадзеным выпадку ўчыніў не дапушчальныя дзеянні не сумяшчальныя са службай у органах унутраных спраў Рэспублікі Беларусь. Акрамя таго супрацоўнікі Цэнтральнага РУУС г. Мінска так і не аддалі мне мой кіёк і мне цяпер цяжка без яго свабодна рухацца".
Ніна Багінская просіць пракуратуру правесці праверку вышэйпрыведзеных фактаў, устанавіць асобу супрацоўніка Цэнтральнага РУУС г. Мінска, які дапусціў парушэнне яе законных правоў і прыняць меры пракурорскага рэагавання ў дачыненні да вінаватых, а таксама аднавіць парушаныя правы і указаць кіраўніцтву РУУС Цэнтральнага р-на г. Мінска аб недапушчэнні падобных дзеянняў у дачыненні да грамадзян з боку супрацоўнікаў РУУС у будучым.
Аналагічная скарга таксама накіраваная на імя Міністра ўнутраных спраў Беларусі.
Нагадаем, што адміністратыўная справа Ніны Багінскай за ўдзел у несанкцыянаваным масавым мерапрыемстве разглядалася ў судзе Цэнтральнага раёна Менска 23 студзеня. Прысуд - штраф у памеры 20 базавых велічынь (3 мільёны 600 тысяч рублёў). Яшчэ 5 удзельнікаў ускладання кветак да помніка Тарасу Шаўчэнку былі пакараныя арыштамі ад 5 да 15 сутак.
