У задавальненні касацыйнай скаргі “Вольнага горада” адмоўлена

2015 2015-01-21T18:58:53+0300 2015-01-21T18:58:53+0300 be http://spring96.org/files/images/sources/gerdzij-mikalaj-niarouny-siargej.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Судовая калегія па грамадзянскіх справах Магілёўскага абласнога суда 21 снежня адмовіла ў задавальненні касацыйнай скаргі выдаўца газеты “Вольны горад” Уладзіміра Кудраўцава на рашэнне суда Крычаўскага раёна ад 8 снежня па пазову начальніка аддзела ідэалогіі, культуры і па справах моладзі Крычаўскага райвыканкама Марыны Максімавай аб абароне гонару, годнасці і дзелавой рэпутацыі.

Старшынствуючая на пасяджэнні суддзя Святлана Стальмахова ў сваім рашэнні паведаміла пра тое, што рашэнне суда Крычаўскага раёна ад 8-га снежня застаецца ў сіле, бо надрукаваныя ў артыкуле “Не ў сваім крэсле?” на інтэрнэт-сайце і ў газеце “Вольны горад” за №27 ад 14 верасня 2014 года звесткі аб Марыне Максімавай з’яўляюцца абразлівымі і ганьбяць гонар і годнасць асобы.

Судовая калегія па грамадзянскіх справах Магілёўскага абласнога суда не прыняла да ўвагі аргументы прысутных на пасяджэнні рэдактара газеты “Вольны горад” Сяргея Няроўнага і аўтара артыкула “Неў сваім крэсле?” журналіста Мікалая Гердзія (на фота) пра тое, што ў публікацыі “Не ў сваім крэсле?” няма ніякай абразы для Марыны Максімавай як для асобы. Прыказка ў артыкуле была дадзена, каб паказаць, што чалавек не разбіраецца ў сваёй працы. Аддзел ідэалогіі райвыканкама і мясцовая раёнка “Крычаўскае жыццё” не надавалі практычна ніякай увагі наступствам абвалу будынку актавай залы і сталовай мясцовай гімназіі, хаця гэта тэма рэгулярна асвятлялася АНТ, БТ, Белта, “Советской Белоруссией” і іншымі дзяржаўнымі выданнямі, таму журналісты “Вольнага горада” і былі вымушаны акцэнтаваць увагу на бяздзейнасць крычаўскай ідэалагічнай “вертыкалі”.

Рэдактар газеты “Вольны горад” Сяргей Няроўны кажа, што журналісты “Вольнага горада” не могуць пагадзіцца з высновамі суда Крычаўскага раёна ад 8 снежня 2014 года і судовай калегіі па грамадзянскіх справах Магілёўскага абласнога суда ад 21 студзеня 2015 года і абавязкова будуць рыхтаваць і падаваць наглядную скаргу.

Нагадаем, што суддзя суда Крычаўскага раёна Алена Азаранка 8 снежня вынесла рашэнне спагнаць з журналістаў газеты “Вольны горад” - яе выдаўца Уладзіміра Кудраўцава, рэдактара Сяргея Няроўнага і журналіста Мікалая Гердзія кампенсацыю за нанесеныя начальніку аддзела ідэалогіі, культуры і па справах моладзі Крычаўскага райвыканкама Марыне Максімавай маральныя страты ў памеры 7 000 000 рублёў, аплачанай ёй дзяржпошліны ў памеры 450 000 рублёў, і выдаткаў, звязаных з удзелам яе прадстаўніка ў судзе ў памеры 3 600 000 рублёў.

Падставай для падачы пазова стаў размешчаны 14 верасня 2014 года на інтэрнэт-сайце газеты “Вольны горад” артыкул “Не ў сваім крэсле?”. Аналагічны артыкул быў змешчаны таксама і ў друкаваным нумары выдання. У артыкуле журналіст газеты “Вольны горад” Васілій Чуб (псеўданім Мікалая Гердзія)падымаў вострую тэму замоўчвання ўладамі Крычаўскага раёна і дзяржаўнай раёнкай “Крычаўскае жыццё” інфармацыі пра наступствы абвалу будынку актавай залы і сталовай мясцовай гімназіі і інфармавання насельніцтва аб дзеяннях уладаў па вырашэнню ўзніклых для школьнікаў і іх бацькоў праблем. Ён пісаў пра тое, што прычыны абрушэння, праблемы арганізацыі навучальнага працэса хвалююць большасць насельніцтва Крычаўскага раёна, аднак мясцовыя ўлады чамусьці гэтую тэму абыходзяць бокам.

 

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international