Адкрыты ліст Еўрапейскай федэрацыі журналістаў і Беларускай асацыяцыі журналістаў у cувязі з пераследам віцебскіх калег

2014 2014-11-26T12:36:36+0300 2014-11-26T12:38:46+0300 be http://spring96.org/files/images/sources/efj-baj-logo.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

26 лістапада тэкст адкрытага ліста будзе адпраўлены ва УУС Віцебскага аблвыканкама і ў аддзел аховы правапарадку і прафілактыкі АУС Чыгуначнага раёна Віцебска, паведамляе прэс-служба БАЖ.     

 

Напярэдадні 5 лістапада, Сусветнага дня “Станем за журналістыку”, група віцебскіх сябраў ГА “БАЖ” сфатаграфавалася на фоне будынка з вядомым гарадскім графіці – выявамі клетак, з якіх вылятаюць зробленыя з газеты птушкі. Цяпер удзельнікаў фотасесіі выклікаюць у Чыгуначны РАУС Віцебска, складаюць пратаколы за ўдзел у несанкцыянаванай акцыі (арт. 23.34 КаАП) і збіраюцца судзіць. Еўрапейская федэрацыя журналістаў і яе сябра – ГА “Беларуская асацыяцыя журналістаў” – лічаць абсурднымі выстаўленыя віцебскім калегам абвінавачанні.

5 лістапада ў свеце праходзіла кампанія “Станем за журналістыку”, якая ладзілася з ініцыятывы Міжнароднай и Еўрапейскай федэрацый журналістаў ужо сёмы год запар. Да гэтай даты журналісты ва ўсім свеце звычайна ладзяць сяброўскія сустрэчы, прэзентацыі, семінары і г.д. для ўзмацнення салідарнасці і ўзаемапаразумення паміж журналістамі. Супольнае фатаграфаванне – гэта адзін з самых распаўсюджаных спосабаў адзначыць гэтую дату, які шырока практыкуецца журналістамі ва ўсім свеце.

Судзіць як за “несанкцыянаваную акцыю” за фотасесію на фоне гарадской сцяны – гэта анекдатычная сітуацыя, якая была б вартая жалю, калі б не адбівалася на лёсах канкрэтных людзей. Фотасесія праводзілася ў прыктычна бязлюдным месцы – каля будынка, зачыненага на рэстаўрацыю, які да таго ж знаходзіцца не ў цэнтры горада. На правядзенне фотасесіі не трэба падаваць заяўку як на правядзенне масавай акцыі: фотасесія не лічыцца масавай акцыяй паводле Закона аб масавых мерапрыемствах у Рэспубліцы Беларусь. Аднак міліцыя расцаніла паводзіны ўдзельнікаў фотасесіі менавіта як "пікетаванне". Удзельнікі фотасесіі катэгарычна не згодныя з такой трактоўкай іх дзеянняў.

ЕФЖ і ГА “БАЖ” таксама пратэстуюць з гэтай нагоды і заклікаюць:

– Аддзел аховы правапарадку і прафілактыкі АУС Чыгуначнага раёна Віцебска і асабіста яго начальніка Аляксандра Рыбакова – тэрмінова адклікаць пратаколы, складзеныя ў дачыненні да ўдзельнікаў фотасесіі.  

– УУС Віцебскага аблвыканкама і асабіста намесніка начальніка ўпраўлення аховы правапарадку і прафілактыкі УУС Аляксандра Каліноўскага – тэрмінова адклікаць з АУС Чыгуначнага раёна Віцебска распараджэнне аб прыцягненні да адказнасці ўдзельнікаў вулічнай фотасесіі.

– Суд, у які могуць паступіць пратаколы пра ўдзел гэтых людзей у “несанкцыянаванай акцыі”, – аб’ектыўна і ўсебакова ацаніць іх справы і вынесці рашэнні, заснаваныя на законе і здаровым сэнсе.

 

Зацверджана Праўленнем ГА “БАЖ” 25.11.2014 г.

Падтрымана Генеральным сакратаром ЕФЖ Рыкарда Гуціэрасам (Ricardo Gutierrez) і Дырэктаркай ЕФЖ Рэнатай Шродэр (Renate Schroeder).

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international