Дазвол на пікет салідарнасці з Украінай пастаўлены ў залежнасць ад… надвор’я

2014 2014-11-21T17:16:00+0300 2014-11-22T10:18:17+0300 be http://spring96.org/files/images/sources/kirpich-znak.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

У судзе Маскоўскага раёна Мінска разглядалася скарга Уладзіміра Андрыенкі на рашэнне Мінгарвыканкама, які па відавочна надуманых прычынах не даў дазволу на правядзенне адзіночнага пікета салідарнасці з Украінай каля амбасады Расійскай Федэрацыі.

Пра гэта паведамляе прэс-служба Камітэта "Салідарнасць".

У абгрунтаванні свайго рашэння намеснік старшыні Мінгарвыканкама Ігар Карпенка напісаў, што адзіночны пікет не будзе спрыяць захаванню добраўпарадкавання і зеляніны, створыць перашкоды для пешаходнага руху і руху транспарту, не будзе спрыяць выкананню ПДР. Пры гэтым чыноўнікі спасылаліся на артыкул 9 Закона “Аб масавых мерапрыемствах у Рэспубліцы Беларусь”.

У судзе прадстаўніком Мінгарвыканкама спадаром Уральскім былі дадаткова агучаныя не менш абсурдныя патрабаванні да заяўніка. Маўляў, патрэбна да заявы прыкласці мапу з канкрэтна намаляванай кропкай, дзе будзе стаць пікетоўшчык, заключыць загадзя дамову з міліцыяй і іншымі структурамі, яшчэ трэба падстроіцца пад надвор’е, бо яно таксама будзе ўлічвацца пры прыняцці рашэння пра дазвол акцыі.

Нягледзячы на тое, што рашэнне гарадскіх уладаў парушае правы грамадзян, гарантаваныя Канстытуцыяй і супярэчыць міжнародным прававым нормам, суддзя Гусакова прызнала скаргу неабгрунтаванай і не задаволіла яе.

“Мы плануем надалей абскарджваць рашэнне раённага суда ў Мінскім гарадскім судзе. Таксама мы плануем падаваць паўторную заяву, дзе паспрабуем улічыць усе, нават абсурдныя патрабаванні і паглядзім, што яны прыдумаюць яшчэ, каб нам адмовіць”, - кажа заяўнік пікета салідарнасці Уладзімір Андрыенка.

Нагадаем, у Мінску была абвешчана так званая карусель адзіночных пікетаў салідарнасці з Украінай. Усе хто падаваў заяўкі ў Мінгарвыканкам, атрымалі адмовы з досыць фармальнымі і няўцямнымі тлумачэннямі.

 

 

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international