Бабруйск: Пляцоўка для пікетаванняў "занятая" на няпэўны час

2014 2014-11-21T15:04:40+0300 2014-11-21T15:04:40+0300 be http://spring96.org/files/images/sources/babr-staduen-piket-2.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Сябры бабруйскай суполкі АГП звярнуліся ў гарвыканкам па дазвол на правядзенне з 20 па 24 лістапада пікетаванняў супраць размяшчэння ў горадзе расійскай ваеннай базы. Актывісты лічаць, што з'яўленне базы супярэчыць артыкулу 18 Канстытуцыі.

"Для аплаты расходаў на правядзенне масавага мерапрыемства будуць выкарыстаны сродкі, атрыманыя ад ахвяраванняў членаў і прыхільнікаў Аб'яднанай грамадзянскай партыі, грамадскіх актывістаў... У сувязі з тым, што пікет праводзіцца з мэтай абароны канстытуцыйнага ладу Рэспублікі Беларусь, прашу гарвыканкам даць распараджэнне адпаведным службам па забеспячэнні грамадскага парадку і бяспекі, арганізацыі медыцынскага абслугоўвання пры правядзенні масавага мерапрыемства, прыборцы тэрыторыі пасля яго правядзення", - адзначалася ў заявах. Месцам правядзення актывісты ўказвалі стадыён фабрыкі "Славянка" -- гэта адзінае ў Бабруйску месца, вызначанае гарвыканкамам для правядзення пікетаванняў.

-Заяўкі на пікетаванні падавалі не толькі сябры АГП, але і іншыя грамадскія актывісты Бабруйска, - распавядае Галіна Смірнова, старшыня мясцовай суполкі прафсаюза РЭП. - Адказы ўжо пачалі прыходзіць. Натуральна, чыноўнікі знайшлі прычыну, каб адмовіць у правядзенні акцыяў. Намеснік старшыні гарвыканкаму Аляксандр Маркачоў напісаў, што якраз у гэтыя дні на стадыёне будзе праводзіцца адкрытае Першынство ДЮСШ па футболе. Тады актывісты пачалі падаваць заявы на іншыя даты: з 30 лістапада па 4 снежня.

Галіна Смірнова вырашыла зайсці на стадыён, каб паглядзець, як праходзіць Першынство па футболе. Але ніякіх спаборніцтваў там не было.

-Я жыву недалёка ад стадыёна, і падчас шпацыру з сабачкам, якога спецыяльна апранула ў спартовы касцюм, зайшла на стадыён. Але замест футбола я ўбачыла на дзвярах комплекса аб'яву, дзе было пазначана, што Першынство ДЮСШ па футболе, запланаванае на перыяд з 20 па 24 лістапада, у сувязі з умовамі надвор'я пераносіцца на перыяд з 30 лістапада па 4 снежня. То бок, якраз тыя даты, якія мы раней і зараз адзначалі ў заявах. Потым мой сабачка забрахаў, і са стадыёна мяне папрасілі сыйсці, але я паспела зрабіць фота гэтай аб'явы, - кажа Галіна Смірнова.

Актывістка мяркуе, што і на іншыя даты ў чыноўнікаў знойдуцца мерапрыемствы.

-Магчыма, сваімі заявамі мы дапаможам зрабіць Бабруйск больш спартовым горадам, калі на кожнае нашае пікетаванне тут на самой справе будуць праводзіцца спаборніцтвы. Пакуль восень - футбол, а там ужо і на лыжы можна перайсці. Мы нават можам далучыцца і таксама паўдзельнічаць, - кажа Галіна Смірнова.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international