У Вярхоўным судзе Беларусі распачаліся працэсы ў справе ліквідацыі двух жаночых аб’яднаньняў — фонду “Касіяпэя” і арганізацыі “Жаночы адказ” (паводле Радыё Свабода).

2003 2003-10-08T10:00:00+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

7 кастрычніка ў Вярхоўным судзе Беларусі распачаліся працэсы ў справе ліквідацыі двух жаночых аб’яднаньняў — фонду “Касіяпэя” і арганізацыі “Жаночы адказ”.

Міністэрства юстыцыі абвінавачвае іх у парушэньні заканадаўства, якое рэгулюе дзейнасьць грамадзкіх арганізацыяў. Кіраўніцы гэтых арганізацыяў лічаць абвінавачаньні юрыдычна неабгрунтаванымі й палітычна матываванымі.

На пачатку паседжаньня ў справе ліквідацыі фонду “Касіяпэя” судзьдзя Вярхоўнага суду Самалюк спытаўся ў прадстаўніка Мінюсту Аляксандра Харытона, ці не хацелі бы бакі мірна вырашыць гэтую справе без судовага ўмяшальніцтва. На гэтую прапанову чыноўнік адказаў:
“Не, міравое пагадненьне немагчымае!”

Абвінавачаньні Аляксандра Харытона наступныя: фонд карыстаецца юрыдычным адрасам, зарэгістраваным на прыватнай кватэры, на блянках арганізацыі няма ўсіх неабходных рэквізытаў, адзін са сходаў фонду ня быў правамоцным, сымболіка арганізацыі на пячатцы і блянку выкананая ня ў колеры і г.д. Да ўсяго чыноўнік абвінаваціў “Касіяпэю” ў супрацоўніцтве зь незарэгістраваным аб’яднаньнем — Асамблеяй няўрадавых арганізацыяў.

Мінюст вынес фонду папярэджаньне 4 жніўня і загадаў за месяц ліквідаваць парушэньні заканадаўства. Але ўжо 12 жніўня чыноўнікі падалі ў суд пазоў аб ліквідацыі арганізацыі, бо, на іхную думку, кіраўніцтва фонду выпраўляць памылкі не зьбіралася.

Старшыня “Касіяпэі” Валянціна Сьвяцкая й яе намесьніца Галіна Сямдзянава абвяргалі абвінавачаньні Мінюсту. На многія вострыя пытаньні жанчын Аляксандар Харытон адказваць адмаўляўся. У выніку судзьдзя перанес разгляд справы на 8 кастрычніка, бо бакі заявілі хадайніцтвы аб далучэньні да справы шэрагу важных дакумэнтаў.

Валянціна Сьвяцкая так пракамэнтавала пабачанае ў судзе: “Паводзіны спадара Харытона сьведчаць, што ён выконвае загад на ліквідацыю тых грамадзкіх аб’яднаньняў, якія не падабаюцца цяперашняй уладзе. Таму ўсе ягоныя меркаваньні, тлумачэньні тых ці іншых парушэньняў носяць схалястычны характар. І ня маюць ніякіх падставаў”.

Падобным чынам суды ўжо зьліквідавалі шэсьць найбольш актыўных беларускіх грамадзкіх арганізацыяў. На чарзе разгляд ліквідацыйнай справы “Фонду братоў Луцкевічаў” — 14 кастрычніка, праваабарончага цэнтру “Вясна” — 21-га. Таксама пададзены пазоў аб закрыцьці “Незалежнага таварыства праўных дасьледаваньняў”. Гомельскія ўлады хочуць ліквідаваць мясцовую “Асацыяцыю дзяцей і моладзі”. Спробы прадстаўнікоў Беларускага Хэльсынскага камітэту абскардзіць у Вярхоўным судзе мінюстаўскае папярэджаньне аказаліся безвыніковымі. Гэтая арганізацыя таксама можа быць у любы момант зьліквідаваная.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international