Лідэр "Альтэрнатывы" асуджаны на 10 сутак

Лідар грамадскага аб’яднання “Альтэрнатыва” Алег Корбан асуджаны судом Фрунзенскага раёна Мінска на 10 сутак адміністратыўнага арышту. 

Па інфармацыі праваабаронцаў, яго затрыманне адбылося 12 жніўня, а 10-й раніцы, каля станцыі метро “Каменная горка”. У РУУС Фрунзенскага раёна Мінска на Корбана быў складзены пратакол за “дробнае хуліганства” – паводле артыкула 17.1 КаАП. 

Як распавёў актывіст “Альтэрнатывы” Ілля Дабратвор, які сёння пасля 14-суткавага арышту выйшаў з ЦІПу на Акрэсціна, Алег Корбан мусіў яго сустракаць. “Аднак, паколькі ён не прыйшоў да ЦІПу, я зразумеў, што штосьці тут не так”, - сказаў Дабратвор, які лічыць, што затрыманні актывістаў арганізацыі, якія пачасціліся ў апошнія месяцы, сведчаць пра мэтанакіраваны пераслед “Альтэрнатывы” за правядзенне кампаніі "За незалежную Беларусь".

Нагадаем, што Алег Корбан 4 ліпеня быў асуджаны да 10 сутак адміністратыўнага арышту – пасля прэвентыўнага затрымання, звязанага са святкаваннем у Мінску 3 ліпеня афіцыйнага дня незалежнасці. Актывіст "Альтэрнатывы" Ілля Дабратвор быў затрыманы 29 ліпеня і асуджаны да 14 сутак адміністратыўнага арышту. А іх паплечнік Алег Кераль быў затрыманы 5 жніўня, калі прынёс на Акрэсціна перадачу Дабратвору, і зараз адбывае 10-суткавы арышт.