Ноу-хау ад Слонімскага райвыканкама: маршрут руху пікета

Сябра слонімскай суполкі БХД Іван Бедка падаваў заяўку на правядзенне пікета ў Слонімскі райвыканкам. Пікет павінен быў прыцягнуць увагу насельніцтва да праблемаў празмернага ўжывання алкаголю і тытуню на Слонімшчыне.

І вось за подпісам старшыні Слонімскага райвыканкама Алега Таргонскага Іван Бедка атрымаў адказ, дзе паведамляецца, што ў правядзенні пікета яму адмовілі, паколькі “адсутнічаюць звесткі аб крыніцы фінансавання, а таксама не вызначаны маршрут руху ўдзельнікаў даннага мерапрыемства”, - піша “Гарадзенская вясна”. 

Аказваецца, каб правесці пікет сёння неабходна паведамляць у заяўцы, хто фінансуе гэты пікет, а таксама ўказваць “маршрут руху пікета”. Магчыма, у Слонімскім райвыканкаме не разумеюць, што такое пікет, мітынг, шэсце, і чым яны адрозніваюцца адзін ад аднаго. Але гэта няведанне не дазволіла сябрам Слонімскага згуртавання дэмакратычных сіл у чарговы раз праводзіць сваё мерапрыемства. І падобныя адмоўныя адказы са Слонімскага райвыканкама слонімскія грамадскія актывісты атрымліваюць ужо каля 10 гадоў.