У Брэсце забаранілі серыю пікетаў за цэласнасць і незалежнасць Украіны
Старшыня Брэсцкай абласной арганізацыі АГП Уладзімір Вуек
Брэсцкія актывісты абласной арганізацыі Аб'яднанай грамадзянскай партыі атрымалі адмову ў правядзенні пяці пікетаў, асноўнай мэтай якіх была заяўлена актуалізацыя ў грамадстве каштоўнасці незалежнасці і суверэнітэту дзяржавы, выказванне салідарнасці з украінскім народам у яго памкненні захаваць цэласнасць і незалежнасць Украіны.
Прычынай для адмовы ў правядзенні пікетаў стала іх заяўка сябрамі партыі ў шматлюдных месцах горада - ля Брэсцкага цэнтральнага ўнівермага, кінатэатра "Беларусь" і гандлёвага цэнтра "Усход". Мясцовым законам гэтыя месцы не прадугледжаныя для правядзення масавых мерапрыемстваў. Прадстаўнікі ўлады спаслаліся на тое, што мерапрыемствы такога характару можна праводзіць толькі ў спецыяльна адведзеных месцах - у парку воінаў-інтэрнацыяналістаў і на стадыёне "Лакаматыў".
Адзін з заяўнікоў пікетаў Уладзімір Вуек адзначае, што заяўкі на мерапрыемствы былі пададзеныя ў адпаведнасці з артыкулам 35 Канстытуцыі Рэспублікі Беларусь, артыкулам 21 Міжнароднага пакта аб грамадзянскіх і палітычных правах, артыкуламі 4 - 6 Закона РБ "Аб масавых мерапрыемствах у Рэспубліцы Беларусь", таму ў дадзеным выпадку можна фіксаваць з боку ўладаў парушэнне не толькі канстытуцыйных правоў грамадзянаў, але і нормаў міжнароднага права.
- Улада яшчэ раз прадэманстравала нам сваё стаўленне да ўкраінскіх падзеяў, неабходнасці захавання суверэнітэту Беларусі і паказала сваё стаўленне да правоў грамадзянаў у цэлым, - падводзіць рысу Уладзімір Вуек.
Па словах актывіста АГП, дадзенае рашэнне мясцовых уладаў будзе абскарджана ў судзе.
