Справа памерлага ў СІЗА Ігара Пцічкіна: Праводзіцца новая праверка

2014 2014-05-30T17:01:53+0300 2014-05-30T17:01:53+0300 be http://spring96.org/files/images/sources/pcichkin-igar.jpg
Ігар Пцічкін

Ігар Пцічкін

4 снежня правялі эксгумацыю цела Ігара Пцічкіна. Родныя яшчэ не маюць вынікаў паўторнага ўскрыцця.

«Заключэнне эксперта гатовае. Але маме пакуль не даюць пачытаць: маўляў, у следчага не хапае часу сустрэцца — паралельна вядзе яшчэ адну справу», — расказала сястра памерлага Ірына.

Прадстаўнік Следчага камітэта Юлія Ганчарова паведаміла, што па выніках паўторнай экспертызы цяпер праводзіцца праверка правільнасці аказання медыцынскай дапамогі супрацоўнікамі СІЗА. Вынікі будуць пазней.

Родныя Пцічкіна таксама адзначылі, што пасля смерці Ігар стаў фігурантам яшчэ аднаго расследавання — па спайсах.

«Выклікаюць у Следчы камітэт сяброў Ігара, цікавяцца ў іх, на якіх машынах брат ездзіў і куды. Яны сказалі, што на Андрэя Н. завялі крымінальную справу. І ён нібыта сведчыў, што Ігар прадаваў спайсы. Але мы адшукалі Андрэя, і ён сказаў, што праходзіць толькі як сведка. Брат мой мёртвы — і на яго можна сказаць што заўгодна. Маму таксама выклікалі даваць паказанні. Гэта мы так разумеем, што на Ігара завялі крымінальную справу. На каго яшчэ, калі ўсе праходзяць сведкамі?»

— расказвае Ірына.

«У вас недакладная інфармацыя. Ні па якой справе ён не праходзіць», — паведаміў прадстаўнік упраўлення Следчага камітэта па Мінску Аляксандр Герасімаў.

21-гадовы Ігар Пцічкін памёр у СІЗА на Валадарскага 4 жніўня 2013. Хлопец мусіў адбыць трохмесячны арышт: сеў за руль аўто, хаця быў пазбаўлены правоў.

На сустрэчы з начальнікам СІЗА родным хлопца паведамілі, што ў Ігара 3 жніўня пачалося «псіхаматорнае ўзбуджэнне». І яго змясцілі ў медыцынскую часць, «дзе давялося фіксаваць яго мяккімі рамянямі». На фотаздымках трупа Пцічкіна заўважныя шматлікія сінякі. Фоты выкладзеныя ў агульны доступ у інтэрнэт.

У смерці хлопца вінавацяць фельчара мінскага СІЗА № 1, які дзяжурыў у ноч смерці. Распачата крымінальная справа за неналежнае выкананне прафесійных абавязкаў медработнікам, што пацягнула за сабой па неасцярожнасці смерць пацыента.

Родныя Пцічкіна правялі 14 верасня каля СІЗА на Валадарскага акцыю з патрабаваннем расследавання справы, у выніку яны былі затрыманыя. Яны лічаць, што Ігара білі перад смерцю.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international