Бабруйск: у кватэры блогера Жалнова ідзе ператрус
Ад раніцы ў кватэры бабруйскага блогера Алега Жалнова ідзе ператрус. Па папярэдняй інфармацыі, міліцыянты шукаюць відэазапіс, які тычыцца выпадку яго затрымання ў будынку УУС "з-за спробы дыстанцыйнага падрыву".
Блогер вядомы тым, што фіксуе ўсе свае размовы з супрацоўнікамі міліцыі, ДАІ і нават кантралёрамі ў транспарце на відэакамеру. Потым ён выкладае гэтыя ролікі ў інтэрнэт і падае на дзеянні парушальнікаў у пагонах скаргі. Вельмі часта гэта сканчаецца судовымі справамі, з якіх Жалноў апошнім часам практычна не вылазіць, бо яны "перацякаюць" з адной у іншую.
Гэта ўжо другі ператрус у кватэры Жалновых. Нагадаем, у мінулым годзе ў блогера ўжо пабывалі нечаканыя "госці". Тады ператрус доўжыўся сем гадзін, а ў выніку міліцыянты сканфіскавалі ўсе тэхнічныя сродкі сувязі: мадэм, смартфон, вінчэсцеры, мабільныя тэлефоны.
