Лукашэнка: мова — не для рэвалюцый

2014 2014-01-22T11:21:17+0300 2014-01-22T11:22:06+0300 be http://spring96.org/files/images/sources/bel-mova-u.jpeg

Аляксандр Лукашэнка даручыў першаму намесніку кіраўніка Адміністрацыі прэзідэнта Беларусі Аляксандру Радзькову вывучыць пытанне аб магчымай падтрымцы грамадскіх арганізацый, якія спрыяюць развіццю беларускай мовы. Даручэнне прэзідэнт зрабіў 21 студзеня падчас сустрэчы з кіраўнікамі найбуйнейшых беларускіх СМІ ў сталічным Палацы незалежнасці.

Ён таксама прапанаваў стварыць спецыяльныя моўныя курсы пад эгідай дзяржаўных інстытутаў і ўніверсітэтаў.

Гэтую тэму ўзняў дырэктар інфармацыйнай кампаніі БелаПАН Алесь Ліпай. Ён звярнуў увагу прэзідэнта на тое, што зараз беларуская мова набірае папулярнасць, аднак працэс адбываецца дзякуючы не дзяржаве, а прадстаўнікам грамадскасці, якія праводзяць моўныя курсы. Больш за тое, адзначыў Ліпай, некаторыя з грамадскіх арганізацый, што спрыяюць развіццю нацыянальнай мовы, як Таварыства беларускай мовы імя Францішка Скарыны, вымушаныя збіраць ахвяраванні, каб заплаціць арэндную плату. Кіраўнік БелаПАН прапанаваў увесці практыку дзяржаўных грантаў для такіх арганізацый.

Лукашэнка, адказваючы на гэтую прапанову, акцэнтаваў увагу на тым, что нельга нічога рабіць пад прымусам.

«Я абсалютна не супраць беларускай мовы. Я нават больш за вас хачу, каб нашыя людзі вольна размаўлялі на беларускай мове. Адзінае, што я не прымаю, — гэта ціск. Як толькі пачынаеш ціснуць — зваротная рэакцыя», — сказаў ён.

Кіраўнік дзяржавы ўпэўнены, што праблема беларускай мовы палітызаваная.

«Мова — не для рэвалюцый… Беларуская мова — не фактар для разгульвання палітыкі. І мы спакойна выведзем краіну, я вам гарантую, калі не будзе разваг пра тое, што мы прыціскаем беларускую мову, а ўзнімаем англійскую ці рускую. Не трэба залішне ўрывацца ў гэта. Гэта вельмі тонкая жывая матэрыя, мы гэта зробім спакойна», — адзначыў Лукашэнка.

На заўвагу пра тое, што ў Беларусі на нацыянальнай мове друкуецца небагата кніг, Лукашэнка нагадаў, што калісь ужо прапаноўваў беларускім літаратарам напісаць хоць адзін годны твор, аднак пакуль ніхто яму такога не паказаў.

«Я казаў, пакладзіце мне хоць адну (кнігу — БелаПАН), напрыклад, «Вайну і мір», і я забяспечу вам гіганцкую падтрымку. Але іх няма», — рэзюмаваў кіраўнік дзяржавы.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international