Аўстрыйскія праваабаронцы прысвяцілі сваю гадавую справаздачу Алесю Бяляцкаму
Аўстрыйская Ліга за правы чалавека
10 снежня ў Вене Аўстрыйская Ліга за правы чалавека, сяброўская арганізацыя FIDH, прэзентавала выніковую справаздачу «Высновы па правах чалавека 2013» («Menschenrechtsbefund 2013»), абвясціўшы, што прысвячае яе віцэ-прэзідэнту FIDH Алесю Бяляцкаму.
На старонцы, якая папярэднічае справаздачы, паведамляецца, што выданне прысвячаецца Алесю Бяляцкаму і гэта прысвячэнне адрасуецца ўсім праваабаронцам, якія знаходзяцца сёння ў зняволенні. А на вокладцы выдання змешчаны плакат FIDH з заклікам да вызвалення беларускага праваабаронцы.
Традыцыя прысвячэння сяброўскімі арганізацыямі Міжнароднай федэрацыі за правы чалавека (FIDH) дакладаў аб сітуацыі з правамі чалавека Алесю Бяляцкаму, зняволенаму віцэ-прэзідэнту FIDH і кіраўніку ПЦ "Вясна", распачалася ў 2011 годзе пасля вынясення яму палітычна матываванага прысуду. У 2011- 2012гг. у розных краінах і кантынентах крэсла беларускага праваабаронцы пуставала падчас прэзентацый гадавой справаздачы аб сітуацыі з праваабаронцамі ў свеце, падрыхтаванай Абсерваторыяй па абароне праваабаронцаў.
