viasna on patreon

Орша: пікет супраць знішчэння парку забаронены

2013 2013-12-08T19:13:30+0300 2013-12-08T19:13:30+0300 be https://spring96.org/files/images/sources/orsha-park-mapa.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Аршанскі райвыканкам забараніў пікет, ініцыяваны актывістамі Юрыем Нагорным і Алесем Шутавым. Акцыя была запланавана на 12 снежня ў абарону парку ў мікрараёне “Чаромушкі”, дзе дрэвы зносяць, каб збудаваць чарговы "шматпавярховік".

Прычына забароны пікету – адсутнасць дамоваў на ахову, медычнае абслугоўванне і прыборку тэрыторыі пасля акцыі. Паводле аднаго з заяўнікаў, Алеся Шутава, з усімі гэтымі службамі выканкам патрабуе заключыць дамовы загадзя:

"Па логіцы ўладаў, трэба заключыць дамовы, заплаціўшы грошы. А пасля гэтага вам усё адно могуць адмовіць у дазволе пікету.Але нават не гэта найбольш абурае: чыноўнікі вызначылі такі парадак падрыхтоўкі акцыяў, які немагчыма выканаць. Райвыканкам патрабуе , каб дамовы з міліцыяй, лекарамі, дворнікамі былі заключаныя загадзя, а самі гэтыя службы згаджаюцца заключыць такія дамовы толькі пасля згоды выканкаму. І ніхто не саступае".

Парк паміж вуліцамі Молакава і Паркавая мае ўласны назоў "Парк піянераў", яго дзеліць на дзве часткі вуліца Партызанская. Назву парка мала хто памятае нават з тутэйшых жыхароў, але для іх гэтая "зялёная выспа" – адзіны куточак жывой прыроды, дзе можна прагуляцца з дзецьмі і падыхаць хоць крыху свяжэйшым паветрам… Праблема вынішчэння парка дзеля будаўніцтва паўстала ў Оршы гэтым летам. Мясцовыя жыхары аднойчы ўбачылі плот на тэрыторыі аднаго з нешматлікіх месцаў адпачынку, а потым пачалі вырубацца дрэвы. Жыхары мікрараёна "Чаромушкі" звярнуліся да журналістаў мясцовага сайта orshatut.by, і таямніца, схаваная за плотам, адкрылася: гарадскія ўлады далі дазвол на пабудовы "шматпавярховіка" проста ў парку.

Аршанцаў абурыла тое, што іх інтарэсы нікім не ўлічваюцца. Але абмеркоўваць шляхі абароны парку на пікеце райвыканкам забараняе. І гэта не адзіная праблема, якую забаронена абмяркоўваць з гараджанамі. Так, напрыканцы кастрычніка мясцовыя актывісты замаўлялі пікет пра неабходнасць рамонту аварыйнага маста цераз Днепр. І таксама атрымалі пісьмовую забарону. Цяпер яны чакаюць разгляду іхнай скаргі ў судзе, бо лічаць, што забарона райвыканкаму парушае правы на правядзенне масавых акцый, на публічнае выказванне сваіх меркаванняў, на свабоду распаўсюду інфармацыі, якую спрабуюць прыхаваць ад землякоў.

 

 

Апошнія навіны

Партнёрства

Сяброўства