Уладзь Яроменак: Дзякуючы «Ўсходняму партнэрству» яшчэ на волі

2013 2013-11-16T15:18:55+0300 2013-11-16T15:18:55+0300 be http://spring96.org/files/images/sources/jaromenak.jpg
Уладзімір Яроменак

Уладзімір Яроменак

Прысуд былому палітвязьню, маладафронтаўцу Ўладзю Яроменку — 3 месяцы арышту за парушэньне ўмоваў прафіляктычнага нагляду — паводле Менскага гарадзкога суду ўступіў у сілу з 12 лістапада. Чаму Яроменка дагэтуль не накіравалі ў вязьніцу?

Уладзь сказаў, што гэта адбудзецца не раней за канец лістапада, і выказаў меркаваньне, чаму яго пакуль трымаюць на волі:

«Патэлефанаваў інспэктару, а той сказаў, каб настройваўся на канец лістапада. Маўляў, тады ў турму адправяць, не раней. Пра дакладны дзень паведамяць дадаткова. Я гэта зьвязваю з самітам „Усходняга партнэрства“, які мусіць адбыцца ў Вільні ў канцы лістапада. Адназначна, што яны ня хочуць павялічваць колькасьць палітвязьняў у гэты момант, а чаму яшчэ?

Што буду рабіць? Як звычайна, жыцьцё працягваецца. Вось жонку буду рыхтаваць да чарговага выпрабаваньня».

У 2011 годзе Ўладзя Яроменка асудзілі на 3 гады зьняволеньня за удзел ў мітынгу пратэсту супраць фальшаваньня прэзыдэнцкіх выбараў 19 сьнежня 2010 году. Празь некалькі месяцаў ён выйшаў на волю паводле памілаваньня, але грамадзкай дзейнасьці не спыніў і неаднаразова затрымліваўся на акцыях салідарнасьці з палітвязьнямі.

Суд паставіў яго на прафіляктычны нагляд міліцыі, тэрмін нагляду працягнулі. У жніўні Першамайскі суд прызнаў Уладзя Яроменку вінаватым у парушэньні правілаў нагляду і асудзіў на тры месяцы арыштнага дому. Гарадзкі суд гэты прысуд пацьвердзіў. Уладзь Яроменак зьбіраецца абскардзіць рашэньне, але мяркуе, што гэта адбудзецца, ужо калі ён апынецца за кратамі. 

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international