viasna on patreon

1 лістапада віцебскія актывісты будуць судзіцца з гарвыканкамам

2013 2013-10-31T16:38:14+0300 2013-10-31T16:38:14+0300 be https://spring96.org/files/images/sources/shaliapau-gaurucikau.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Хрыстафор Жаляпаў і Аляксей Гаўруцікаў.

Хрыстафор Жаляпаў і Аляксей Гаўруцікаў.

Атрымаўшы адмову на правядзенне шэсця і мітынгу, каардынатар Руху "За свабоду" па Віцебскай вобласці Хрыстафор Жаляпаў і актывіст аргкамітэту па стварэнні сацыял-дэмакратычнай партыі "Народная Грамада" Аляксей Гаўруцікаў  звярнуліся ў Кастрычніцкі райсуд. Актывісты лічаць, што  чыноўнікі парушылі заканадаўства, забараніўшы акцыі, і парушылі правы грамадзянаў на свабоднае выражэнне сваіх думак.

Заяўка Хрыстафора Жаляпава і Аляксея Гаўруцікава, не задаволеная гарадскімі чыноўнікамі, тычылася правядзення акцый салідарнасці з урачом Ігарам Пастновым, які на той час знаходзіўся на прымусовым псіхіятрычным лячэнні. Актывісты хацелі выказаць пратэст супраць выкарыстання псіхіятрычных медычных установаў супраць грамадзянаў, якія выказваюць сваю нязгоду з уладамі.

Шэсце планавалася па тэрыторыі некалькіх раёнаў горада, таму заяўка была пададзена ў гарвыканкам, а не ў раённыя адміністрацыі.

Адмова актывістам прыйшла за подпісам намесніка старшыні гарвыканкама Уладзіміра Шломы. Ен спасылаўся на рашэнне гарвыканкаму ад 10.07.2009 г. № 881 "Аб масавых мерапрыемствах у Віцебску", згодна з якім заяўнікі мерапрыемстваў мусяць разам з заяўкай прадставіць уладам і дамовы на абслугоўванне акцый структурамі ЖКГ, міліцыяй і медыкамі.

"Аднак у рашэнні Віцебскага гарвыканкаму нічога не гаворыцца пра арганізацыю шэсцяў – толькі пра пікеты і мітынгі. Адпаведна, чыноўнікі далі нам адмову беспадстаўна, спаслаўшыся на гэтае рашэнне ў дадзеным выпадку. І гэта відавочнае парушэнне нашага права на свабоду масавых мерапрыемстваў", -- тлумачыць сітуацыю Аляксей Гаўруцікаў.

Ён падкрэслівае, што і само рашэнне № 881 "Аб масавых мерапрыемствах у Віцебску" практычна не выканальнае:

"Усе нашы ранейшыя спробы напярэдадні пікетаў ці мітынгаў заключыць дамовы з адказнымі структурамі сканчваліся крахам. Адказныя асобы не пагаджаюцца на супрацоўніцтва, пакуль няма дазволу на акцыю ад органа ўлады. А ўладныя структуры патрабуюць такіх дамоваў. Атрымліваецца зачараванае кола, у якім мы круцімся ўжо 3, 5 гады. За гэты час віцебскім апазіцыянерам не ўдалося атрымаць ніводнага дазволу на правядзенне масавых акцый".  

Аляксей Гаўруцікаў і Хрыстафор Жаляпаў просяць суд прызнаць апошнюю адмову гарвыканкаму незаконнай, бо яна вынесена неадпаведным чынам і парушае правы грамадзянаў. Актывісты просяць таксама, каб суд абавязаў гарвыканкам даць дазвол на акцыі – шэсце і мітынг, прысвечаныя ранейшай праблеме. Хаця Ігар Пастноў ужо выйшаў з псіхіятрычнага шпіталю, пагроза выкарыстання  псіхіятрычных медычных установаў супраць грамадзянаў, якія выказваюць сваю нязгоду з уладамі, лічаць віцебскія апазіцыянеры.

Апошнія навіны

Партнёрства

Сяброўства