Мазырскі праваабаронца сустрэўся з дэпутатамі парламента

2013 2013-10-15T23:40:34+0300 2013-10-15T23:40:34+0300 be http://spring96.org/files/images/sources/celiapun.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Уладзімір Целяпун

Уладзімір Целяпун

15 кастрычніка мазырскі праваабаронца Уладзімір Целяпун сустрэўся са старшынёй Пастаяннай камісіі ПП НС РБ “Па ліквідацыі наступстваў аварыі на ЧАЭС” Сяргеем Каноплічам (Палеская выбарчая акруга №43) і дэпутатам ПП НС РБ ад Мазырскай выбарчай акругі №42 Мікалаем Расоха. Абвестка аб прыёме грамадзян была загадзя надрукаваная ў мясцовай газеце “Жыццё Палесся”, і праваабаронца запісаўся на прыём.

Акрамя названых дэпутатаў, на сустрэчы прысутнічалі іх памочнікі ў выбарчых акругах, старшыня Мазырскага Савета раённых дэпутатаў Сяргей Гвоздзь, прадстаўнікі ідэалагічнага і юрыдычнага аддзелаў райвыканкама.

«Мяне цікавілі два пытанні. Першае, што робіць ПП НС па ўвядзенню мараторыя на смяротнае пакаранне ў Беларусі. І другое - наконт масавых мерапрыемстваў. Спрабуючы з 2011 года правесці ў Мазыры масавае мерапрыемства, а яго заўжды мясцовыя ўлады забараняюць, я звярнуўся да дэпутатаў з прапановай параіць, як грамадзянам скарыстацца на законных падставах правамі і свабодамі, гарантаванымі Канстытуцыяй Рэспублікі Беларусь. Але дакладнага адказу атрымаць не давялося, ды і парадаў таксама, - каментуе свой візіт да дэпутатаў Уладзімір Целяпун. - Людзей на прыём да дэпутатаў было няшмат. Перада мною зайшлі разам два мужчыны, і праз хвілін 10 яны ўжо і выйшлі. За мной нікога болей не было, таму мне адвялі дастаткова часу, каб і выказаць сваё меркаванне, і паслухаць развагі…»

Праваабаронца падкрэслівае, што не пачуў адказаў на свае пытанні:

«Асноўны сэнс адказу Канопліча на першае пытанне: наша грамадства не гатовае да новага рэферэндуму па адмене смяротнага пакарання. Маўляў, патрэбна вялікая тлумачальная праца. А наконт другога пытання адказ быў такі: калі б людзі жадалі ўдзельнічаць у пікеце, яны б па запрашэнню прыйшлі б і на стадыён “Спартак”… Аднак мой зварот быў зарэгістраваны, і я спадзяюся атрымаць пісьмовы адказ. Дарэчы, калі я звяртаюся да дэпутатаў па-беларуску, то жадаў бы і чуць адказы на гэтай жа дзяржаўнай мове. На што Мікалай Расоха прадэклараваў сваё веданне роднай мовы радкамі з паэмы Якуба Коласа “Новая зямля”. А вось наўпрост выказаць сваё меркаванне ў яго, на жаль, ведаў не хапіла.

Напрыканцы сустрэчы праваабаронца прасіў дэпутатаў звярнуць ўвагу на сітуацыю з Незалежным прафсаюзам на МНПЗ. Больш за 20 год гэты прафсаюз дзейнічае на прадпрыемстве. І ў гэтым яго адметнасць. З прыходам на прадпрыемства новага намесніка генеральнага дырэктара па кадрах і сацыяльнай палітыцы, былога начальніка Мазырскага гарадскога аддзела КДБ Генадзя Цецярука пачаўся ціск як на сам прафсаюзны актыў, так і на шэраговых сябраў. Праз начальнікаў цэхаў, участкаў, майстроў на рабочых і спецыялістаў ідзе ціск, іх пераконваюць, што для пабудовы сваёй кар’еры і атрымання іншых прывілеяў неабходна быць чальцом толькі афіцыйнага прафсаюза.

Таксама дэпутатам былі перададзены інфармацыйныя матэрыялы, відэафільмы супраць смяротнага пакарання, справаздача кампаніі “Праваабаронцы за свабодныя выбары” з аглядам вынікаў выбараў у Палату прадстаўнікоў 2012 года і іншыя інфармацыйныя матэрыялы па парушэннях і абароне правоў чалавека ў Беларусі.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international