Бялынічы: пададзена заяўка на пікет супраць замежных вайсковых баз

Бялыніцкія актывісты Партыі БНФ 19 жніўня падалі ў мясцовы райвыканкам заяўку на правядзенне пікету супраць размяшчэння на тэрыторыі Рэспублікі Беларусь замежных вайсковых баз і вайсковых аб’ектаў.

Сябры Партыі БНФ просяць райвыканкам дазволіць правесці пікет з 11-00 да 12-00 8 верасня на пляцоўцы перад раённым Цэнтрам культуры ў гарадскім пасёлку Бялынічы. Меркаваная колькасць удзельнікаў пікетавання – 5 чалавек.

Арганізатары правядзення мерапрыемства прыклалі да заявы на правядзення пікетавання абавязальніцтва, у якім гарантуюць выкананне патрабаванняў заканадаўства падчас падрыхтоўкі і правядзення мерапрыемства.

Бялыніцкія сябры Партыі БНФ адзначаюць, што ў Канстытуцыі краіны запісана, што “Рэспубліка Беларусь ставіць сваёй мэтай зрабіць сваю тэрыторыю без’ядзернай зонай, а дзяржаву – нейтральнай”, таму любыя іншаземныя базы на тэрыторыі нашай краіны абсалютна непатрэбны. Беларусь - мірная краіна і не збіраецца ні з кім ваяваць.