Баранавічы: суд вярнуў справу абвінавачанага ў арганізацыі прадпрымальніцкіх страйкаў на дапрацоўку
Баранавіцкі прадпрымальнік і грамадскі актывіст Мікалай Чарнавус атрымаў ліст за подпісам старшыні суда Баранавіцкага раёна і г. Баранавічы Мікалая Кміты, у якім паведамляецца, што ў адпаведнасці з пастановай суда 29 ліпеня 2013 года яго справа аб адміністацыйным правапарушэнні вяртаецца назад у міліцыю для выпраўлення недахопаў.
Раней мы паведамлялі, што супрацоўнік Баранавікага ГАУС маёр міліцыі Дзмітрый Мізгер склаў на Мікалая Чарнавуса два пратаколы адміністрацыйнага правапарушэння. Грамадскі актывіст абвінавачваўся ў парушэнні ч.3 арт.23.34 (арганізацыя і правядзенне несанкцыянаванага масавага мерапрыемства) падчас мітынгаў баранавіцкіх прадпрымальнікаў 27 чэрвеня і 1 ліпеня 2013 года.
– Гэта быў стыхійны сход прадпрымальнікаў каля гарадской падатковай інспекцыі і на кааператыўным рынку. Сёння мы не ўпэўнены не толькі ў сваім становішчы, але і ў тым, што дзяржава абароніць дробны бізнес па новых правілах Мытнага саюзу. Таму баранавіцкія іпэшнікі правялі стыхійны страйк. Ну а маёр міліцыі Дзмітрый Мізгер, магчыма, зрабіў шмат юрыдычных памылак пры напісанні пратакола, якія суд лічыць неабходна выправіць, – паведаміў Мікалай Чарнавус.
