Прэтэнзіі грамадзян, парушэнні правоў якіх прызнаў Камітэт па правах чалавека ААН, МЗС лічыць неабгрунтаванымі

2013 2013-06-25T10:08:48+0300 1970-01-01T03:00:00+0300 be http://spring96.org/files/images/sources/mzs_rb.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Гомельскія праваабаронцы Леанід Судаленка і Васіль Палякоў атрымалі адказ з Міністэрства замежных спраў на зварот групы грамадзян Беларусі, парушэнні правоў якіх з боку дзяржавы былі прызнаныя Камітэтам па правах чалавека ААН. Нагадаем, група грамадзян, якія звярталіся ў КПЧ, і скаргі якіх былі задаволены міжнароднай структурай ці знаходзяцца зараз там на разглядзе, звярнуліся ў шэраг інстанцый, у тым ліку беларускае МЗС, з патрабаваннем выконваць рашэнні Камітэта па правах чалавека ААН.

Намеснік міністра замежных спраў Валянцін Рыбакоў адказаў на зварот грамадзян, што іх прэтэнзіі ён лічыць неабгрунтаванымі. Прычым у лісце чыноўнік зазначыў, што адказвае грамадзянам, «у дачыненні да якіх КПЧ былі нібыта ўстаноўлены парушэнні правоў».

Валянцін Рыбакоў піша, што, згодна з Факультатыўным пратаколам да Міжнароднага Пакту аб грамадзянскіх і палітычных правах, Камітэт па правах чалавека ААН не разглядае паведамленні ад асобаў, пакуль не спраўдзіць інфармацыю, што заяўнікі выкарысталі ўсе сродкі ўнутранай прававой абароны. «Меркаванні Камітэту ў адносінах беларускіх грамадзян былі вынесены гэтым органам у парушэнне Факультатыўнага пратаколу. Беларусі бок своечасова інфармаваў Камітэт аб такіх парушэннях, у сувязі з чым абвінавачанні заяўнікаў аб нібыта «ігнараванні» меркаванняў Камітэту лічым неабгрунтаванымі», - выказаўся намеснік міністру.

Леанід Судаленка звяртае ўвагу, што службовая асоба па сутнасці абвінавачвае Камітэт па правах чалавека ў парушэнні ўласных рэгламентаў і свядома замоўчвае аб шэрагу спраў, у якіх былі вычарпаныя ўсе даступныя ўнутраныя сродкі прававой абароны, уключаючы падачу наглядных скаргаў у Вярхоўны суд і да Генеральнага пракурора.

«Што тычыцца тых разгледжаных Камітэтам спраў, дзе грамадзяне не звярталіся, напрыклад, са скаргай да пракурора або ў прэзідэнцкую адміністрацыю, заяўляю, што такія інстанцыі не адказваюць міжнароднаму крытэрыю эфектыўнасці», - падкрэсліў юрыст. Ён нагадаў, што ў Беларусі быў расстраляны чалавек, наглядная скарга якога яшчэ знаходзілася на разглядзе ў Вярхоўным судзе.

З пачатку 90-х гадоў у Камітэт па правах чалавека ААН паступіла каля 150 індывідуальных паведамленняў беларускіх грамадзян аб парушэнні тых ці іншых правоў. У дачыненні да 43 заяўнікаў КПЧ зафіксаваў тыя ці іншыя парушэнні, яшчэ 74 скаргі знаходзяцца на разглядзе. Але пакуль ніводнае рашэнне КПЧ не было выканана беларускімі ўладамі.

 

 

 

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international