Кіраўнік Östgruppen: “Справядлівасць у Беларусі ў рэшце рэшт пераможа”
Марцін Угла чытае тэкст Алеся Бяляцкага
Пытанне правоў чалавека ў Беларусі застаецца ў фокусе ўвагі не толькі беларускіх праваабаронцаў, але і замежных праваабарончых арганізацый. Вялікую працу па распаўсюдзе інфармацыі пра правы чалавека ў Беларусі, салідарныя акцыі і шмат яшчэ розных відаў дзейнасці ажыццяўляе шведская праваабарончая арганізацыя Östgruppen. Пра гэта распавядае кіраўнік арганізацыі Марцін Угла.
- Гэтай вясной мы вельмі актыўна працавалі ў пытаннях, звязаных з Беларуссю. Мы праводзілі дастаткова вялікія кампаніі супраць правядзення чэмпіянату свету па хакею ў Мінску ў 2014 годзе. З аднаго боку, кампанія не ўдалася -- Міжнародная федэрацыя хакею вырашыла праводзіць чэмпіянат у Беларусі. Але нам ўдалося падняць маштабна пытанне адносна правоў чалавека ў Беларусі. І гэтая інфармацыя вельмі важная для шведаў.
- Ці займаецеся вы пытаннямі наяўнасці палітвязняў у Беларусі, у прыватнасці, Алеся Бяляцкага?
- Канешне, гэта вельмі цяжкая сітуацыя. Мы ўвесь час стараемся нагадаць пра тое, што Алесь Бяляцкі ўвесь час знаходзіцца за кратамі. Рэгулярна патрабуем, каб нашы палітыкі і палітыкі Еўразвязу ставілі патрабаванні аб вызваленні Алеся Бяляцкага і ўсіх палівязняў. У апошнія гады, асабліва пасля снежня 2010 года, шведскае насельніцтва стала больш гэта ведаць пра Беларусь і падзеі, якія там адбываюцца. Інфармацыю пра сітуацыю ў Беларусі пашырыў таксама і чэмпіянат хакею ў Швецыі, калі быў скандал з бел-чырвона-белым сцягам.
- Хто арганізаваў акцыю ў Швецыі ў падтрымку бел-чырвона-белага сцяга?
- Шведская ініцыятыва Інфа-Беларусь. Да яе далучылася шмат беларусаў, якія жывуць у Стакгольме. Гэта была вельмі ўдалая акцыя. Вынікам яе стаў дазвол бел-чырвона-белага сцяга на арэне ў дальнейшых матчах.
- Чаму стала магчымай у Швецыі такая сітуацыя з нацыянальным сцягам?
- Афіцыйная беларуская дэлегацыя запатрабавала, каб выгналі фанатаў з бел-чырвона-белымі сцягамі. А шведскія арганізатары не так добра разумеюць сітуацыю і пагадзіліся на гэта. Канешне, гэта ганебнае рашэнне. Арганізатары хацелі, каб чэмпіянат не быў палітызаваны. Але сваім рашэннем яны якраз палітызавалі мерапрыемства.
Што датычыць чэмпіянату свету па хакеі ў Беларусі, то мы будзем старацца інфармаваць шведскіх хакеістаў і шведскіх фанатаў, каб яны ведалі, у якую краіну паедуць, і што ёсць пэўная рызыка таго, што імі будуць карыстацца ў палітычных інтарэсах рэжыму.
Хачу адзначыць, што Östgruppen мае намер і надалей прыцягваць увагу шведаў да сітуацыі ў Беларусі. Для нас у гэтым накірунку вельмі важным з’яўляецца супрацоўніцтва з беларускімі праваабаронцамі. Мы лічым, што гэта вельмі важная справа. Я аптыміст. І думаю, што ў рэшце рэшт справядлівасць пераможа.
Марцін Угла з’яўляецца неўязным у Беларусь. Апошнія некалькі гадоў шведскаму праваабаронцу адмаўляюць у беларускай візе.
