Улады Рэчыцы забаранілі пратэстанцкай абшчыне Сьведкі Яговы прыбудаваць лекцыйную залю да купленага прыватнага дома (Радыё Свабода)

2003 2003-08-27T10:00:00+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Напачатку лета Рэчыцкі райвыканкам дазволіў егавістам прыбудаваць да купленага прыватнага дома на вуліцы Камуністычнай роты лекцыйную залю. Калі быў ужо пастаўлены каркас і накрыты дах, нечакана райвыканкам запатрабаваў спыніць будоўлю.

Распавядае кіраўнік абшчыны Сьведкі Яговы Сьцяпан Лугоўскі.

(Лугоўскі: ) “Мы ня можам сказаць дакладна, што ад каго залежала. Але раённыя ўлады нечакана запатрабавалі спыніць рэканструкцыю дома. Раней дазволілі, цяпер — забаранілі”.

Як удалося высьветліць, да забароны нечакана спрычыніўся і мясцовы пракурор Віктар Будкоў. Ужо пасьля пачатку будоўлі пракурор ўнёс пратэст на рашэньне раённага выканкаму.

Фармальнай падставай паслужыла тое, што абшчына не перавяла ва ўстаноўленым парадку прыватны жылы дом у шэраг нежылых памяшканьняў. Акурат дзеля гэтага трэба было зьвярнуцца ў абласны выканаўчы камітэт, бо раённая ўлада паводле дзейнага заканадаўства ня мае права на такія дазволы.

Аднак егавістаў на гэтым шляху падпільноўвае новая складанасьць. Улады цьвердзяць, што ніякай лекцыйнай залі ў пратэстанцкай абшчыны быць ня можа. Вось што, у прыватнасьці, заявіў старшыня Рады ў справах рэлігіяў і нацыянальнасьцяў аблвыканкаму Ўладзімер Кляўцоў.

(Кляўцоў: ) “Яны спрабуюць словаблудам замазаць, што гэта — культавы будынак, і называюць яго лекцыйнай заляй. Іншага ж культавага будынка ў іх няма”.

У такім разе, паводле адмысловага ўказу Лукашэнкі, абшчына павінна атрымаць згоду на культавы будынак ня толькі ў рэгіёне, але і ў Камітэце справаў рэлігіяў і нацыянальнасьцяў пры Савеце Міністраў.

Абшчыны такім чынам накіроўваюць па вялікім бюракратычным коле.

Гэта, дарэчы, сталася адной з прычынаў таго, што ўсё 7 наяўных у рэгіёне суполак Сьведак Яговы ня маюць уласных культавых будынкаў.

У такім жа становішчы апынулася і бальшыня іншых пратэстанцкіх абшчынаў. Яны змушаныя арандаваць памяшканні або патаемна зьбірацца ў прыватных дамах адзінаверцаў. І гэта ў той час, калі пратэстанцкія абшчыны розных кірункаў складаюць амаль 40% зь ліку ўсіх рэлігійных парафіяў, што зарэгістраваныя і дзейнічаюць на тэрыторыі рэгіёну.

Казімер Яноўскі, Гомельская вобласьць

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international