Салігорскія ўлады адмаўляюцца рабіць беларускамоўныя шыльды
Гарадская арганізацыя “Таварыста беларускай мовы” атрымала адказ на свой зварот аб прывядзенні назваў салігорскіх органаў уладаў у адпаведнасць Канстытуцыі і Закону “Аб мовах”. Сярод іншага ТБМ патрабавала вывесіць шыльды на будынку Салігорскага райвыканкаму і раённага Савета дэпутатаў на дзяржаўнай беларускай мове, уваход якіх дагэтуль аздоблены шыльдамі толькі на рускай мове.
У сваім адказе ўлады спасылаюцца на артыкул 17 Канстытуцыі, паводле якога “дзяржаўнымі мова ў Беларусі з’яўляюцца беларуская і руская мова”. З гэтага чыноўнікі робяць выснову, што “дзейнасць мясцовых органаў не супярэчыць дзеючаму заканадаўству”.
З такою трактоўкай канстытуцыйнай нормы катэгарычна не згодны старшыня Салігорскай гарадской арганізацыі ТБМ Мікалай Шаравар. Абаронца беларускай мовы нагадвае пра артыкул 31 закона “Аб мовах”, паводле якога “назвы дзяржаўных органаў i iншых арганiзацый даюцца на беларускай і (ці) рускай мовах”.
- На жаль, чыноўнікі вельмі часта прыкрываюцца вось гэтымі “ці” ў Законе “Аб мовах”, - кажа Мікалай Шаравар, - і такім чынам абгрунтоўваюць законнасць фактычнай дыскрымінацыі беларускамоўных грамадзян нашай краіны.
Кіраўнік салігорскай філіі ТБМ лічыць недапушчальным такое стаўленне да беларускамоўных жыхароў і гасцей раёну. Наяўнасць недахопаў у заканадаўстве, на думку Мікалая Шаравара, не з’яўляецца нагодай для дыскрымінацыі.
