Мікола Уласевіч атрымаў літоўскую візу
Грамадска-палітычны актывіст Мікалай Уласевіч
Каардынатар Беларускай антыядзернай кампаніі Мікола Уласевіч атрымаў візу ў Літву з правам з 9 студзеня наведваць гэтую краіну. Разам з візай яму былі прынесены прабачэнні за мінулагоднюю забарону на ўезд у Літву, дзе ў гэты час праводзіўся рэферэндум па пытанні будаўніцтва атамнай электрастанцыі.
- Забарона была вынесена не толькі мне, а вялікай колькасці людзей. Я думаю, гэта было зроблена ў сувязі з тым, што ў Літве праходзіла выбарчая кампанія і рэферэндум па будаўніцтве літоўскай АЭС. Напэўна, камусьці з палітыкаў не падабалася наша прысутнасць на абмеркаванні пытання ў літоўскім Сейме, таму і не пусцілі. Забарона была вынесена на 3 месяцы. Я лічу, што яны зрабілі вялікую памылку.
Гэта парушэнне правоў, але ў сувязі з тым, што забарона для яго адменена, Мікола Уласевіч не бачыць сэнсу весці судовыя разбіральніцтвы. Пакуль каардынатар Беларускай антыядзернай кампаніі не збіраецца праводзіць нейкіх новых акцый пратэсту супраць будаўніцтва АЭС, бо ў дачыненні да яго яшчэ не спынена справа па артыкуле 23.4 Адміністрацыйнага кодэксу – непадпарадкаванне супрацоўнікам міліцыі. Па словах Уласевіча, справу сфабрыкавалі пасля затрымання перад выбарамі, чарговы судовы разгляд па гэтым абвінавачванні пройдзе 29 студзеня ў Гарадзенскім абласным судзе.
