Дзяржава абмяжоўвае правы чытачоў: бібліятэкі ня могуць выпісваць недзяржаўную прэсу

2007 2007-02-19T10:00:00+0200 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Недзяржаўную рэгіянальную газету “Витебский курьер М” абласная бібліятэка не можа выпісваць пры ўсім жаданні на тое, – вынікае з афіцыйнага ліста начальніка ўпраўлення культуры Віцебскага аблвыканкама Мікалая Пашынскага, які атрымаў на гэтым тыдні сябра праваабарончай арганізацыі “Беларускі Хельсінскі Камітэт” Павел Левінаў.

Як распавёў прэс-службе БАЖ спадар Левінаў, да яго, як да прадстаўніка БХК у Віцебскай вобласці, пачалі звяртацца віцебляне са скаргамі, што ў чытальных залах бібліятэк горада немагчыма пагартаць газету “Витебский курьер”. Паводле гараджан, гэта парушае іх грамадзянскія правы на атрыманне інфармацыі.

“Я наведаўся ў абласную бібліятэку і ўпэўніўся, што газеты сапраўды няма ў чытальнай зале. На маё пытанне, чаму не выпісваюць гарадскую газету “Витебский курьер”, супрацоўніцы адказалі: “На вялікі жаль, гэта не ад нас залежыць, а газету сапраўды вельмі часта просяць наведвальнікі”, – расказаў Павел Левінаў. – Я зрабіў запіс у кнізе водгукаў, дзе папрасіў улічыць пажаданні чытачоў і мець у бібліятэцы таксама падшыўку “Витебского курьера”.

Кіраўніцтва Віцебскай абласной бібліятэкі пісьмова адказала, што гэта пытанне не ў яго кампетэнцыі, і прапанавала праваабаронцу звярнуцца ва ўпраўленне культуры аблвыканкама.

“Бібліятэка пры ўсім жаданні не мае магчымасці выпісваць усе перыядычныя выданні, якія друкуюцца ў рэспубліцы і бліжэйшым замежжы”, – заявіў у сваім адказе кіраўнік ўпраўлення культуры Віцебскага аблвыканкама. І далей паведаміў, што, “не гледзячы на абмежаванасць бюджэтных сродкаў”, абласная бібліятэка выпісала 713 выданняў.

“Пастараюся знайсці грашовыя сродкі, каб падпісаць абласную бібліятэку на “Витебский курьер”, – расказаў Павел Левінаў. Ён выказаў намер звярнуцца ва ўпраўленне культуры з прапановай аказаць ім такую дапамогу.

У лісце начальніка ўпраўлення культуры адзначаецца, што бібліятэка, робячы падпіску, арыентуецца на выданні, якія выходзяць вялікімі накладамі. На яго думку, гэта значыць – карыстаюцца попытам у чытачоў.

“Наклад газеты “Витебский курьер М” складае 1500, любы жадаючы мае магчымасць падпісацца ў прыватным парадку на дадзенае выданне альбо ж азнаёміцца ў рэдакцыі з публікацыямі газеты”, – сцвярджае Мікалай Пашынскі.

Нагадаем, што з пачатку 2006 года “Витебский курьер” немагчыма выпісаць праз каталог “Белпошты”. Напрыканцы 2005 года дзяржаўнае паштовае прадпрыемства-манапаліст адмовілася распаўсюджваць газету і выключыла разам з шэрагам іншых недзяржаўных выданняў з падпіснога каталога. “Белсаюздрук” у гэты ж час адмовіўся прадаваць газету ў сваіх кіёсках.

Газета страціла шляхі распаўсюду, і гэтая акалічнасць вымусіла рэдакцыю “Витебского курьера” знізіць наклад. А ў адрозненні ад афіцыйных выданняў “ВК” не атрымлівае фінансавай падтрымкі ад дзяржавы.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international