Акцыя на Бярозаўшчыне ў Дзень правоў чалавека

Праваабаронцы і грамадскія актывісты ў Дзень правоў чалавека раздалі больш за трыста буклетаў пра беларускіх палітвязняў і асобнікаў Усеагульнай дэкларацыяй  правоў чалавека на вуліцах горада Бярозы і пасёлка Малеч.

Як адзначылі праваабаронцы па выніках акцыі, людзі значна ахвотней бралі літаратуру, чым у мінулыя гады. Многія дзякавалі. Тых, хто адмовіўся, было зусім няшмат. А адзін з тых, хто адмовіўся, патлумачыў, што не бярэ літаратуру, бо ў Беларусі  пастаянна парушаюцца правы чалавека - і лепш іх не ведаць, спаць будзеш спакайней.

Правядзенне гэтай інфармацыйнай акцыі праваабаронцы і актывісты палічылі сваім маленькім унёскам у справу пашырэння інфармацыі пра  палітвязняў і абароны правоў чалавека.

Акцыя прайшла бесперашкодна.