Суд апраўдаў моладзевую актывістку Насту Александровіч, незаконна затрыманую напярэдадні мясцовых выбараў
Сёньня ў судзе Фрунзенскага раёну судзьдзя Лукомская Юлія Юр'еўна, заслухаўшы паказаньні сьведкаў з боку абвінавачваньня - чатырох міліцыянтаў, на падставе супярэчлівых сьведчаньняў палічыла віну Насты Александровіч недаказанай і апраўдала моладзевую актывістку. Дзяўчына паведаміла, што судзьдзя сапраўды аб'ектыўна і неперадузята паставілася да разгляду справы, таму вельмі задаволеная прынятым рашэньнем.
Нагадаем, Наста Александровіч была затрыманая супрацоўнікамі міліцыі і КДБ у сваёй кватэры 12 студзеня падчас правядзеньня ў яе вобыску. Яе абвінавацілі ў брыдкаслоўі (арт. 156 КаАП - дробнае хуліганства) і да суду, які адбыўся 15 студзеня, знаходзілася ў сьпецпрыёмніку-разьмеркавальніку на Акрэсціна. Паколькі сьведкі не зьявіліся на судовае паседжаньне, а зьвесткі, выкладзеныя ў рапартах міліцыянтаў і пратаколе затрыманьня былі супярэчлівымі, судзьдзя адклала судовае паседжаньне. Цяпер Наста Александровіч мае права патрабаваць маральную кампенсацыю за незаконнае ўтрыманьне яе пад вартай.
