На Гарадзеншчыне з настаўнікаў пачалі ствараць дружыны для патруляваньня вуліц

Па зьвестках Еўрапейскага радыё для Беларусі, школьных настаўнікаў прымушаюць „патруляваць” вуліцы сваіх населеных пунктаў. Адпаведнае распараджэньне прынята адзьдзелам адукацыі райвыканкаму.

"Дзяжурства” арганізавана ў дзьве змены — з 10.00 да 15.00 і з 15.00 да 20.00 кожную суботу. Настаўнікі павінны назіраць за сваімі вучнямі на тэрыторыі, якую абслугоўвае школа. У адзьдзеле адукацыі паведамілі, што акцыя мае на мэце прафілактыку правапарушэньняў сярод падлеткаў і павінна засьцерагчы школьнікаў ад ужываньня алкаголю і тытуню.

Самі настаўнікі аптымізму кіраўніцтва не падзяляюць і бачаць сваю місію у наступным: „Хадзіць па вуліцы і сачыць, каб дзеці ня пілі піва, а сядзелі дома з бацькамі”.